«Вектор» вирусология уонна биотехнология судаарыстыбыннай научнай киинэ коронавируһу утары вакцина чинчийиллибитин туһунан биллэрдэ.
edersaas.ru
Бу туһунан Роспотребнадзор салайааччыта Анна Попова «Россия-1” ханаалга, вакцинаны чинчийии түһүмэхтэрэ этэҥҥэ ааспыттарын, оттон от ыйын 15 күнүттэн бэйэлэрэ сөбүлэспит дьоҥҥо боруобалаан көрүү ыытылларын иһитиннэрбит. “Вектор” дириэктэрэ Ринат Максютов, чинчийии 1-2 кэрдииһигэр, килииникэҕэ бэйэлэрэ тылламмыт 300 киһиэхэ боруобалааһын ыытыллыбытын эппит итиэннэ: «Аны от ыйын 15 күнүттэн элбэх киһиэхэ боруобалаан көрүү ыытыллар”, — диэн ый анараа өртүгэр эппит. Кини Арассыыйаҕа бастакы вакцина препарата быйыл күһүн регистрацияланара күүтүллэр диэбит.
Арассыыйаҕа өссө ыам ыйын бүтүүтэ, 14 тэрилтэ коронавирус утары вакциналары чинчийиигэ үлэлэһэ сылдьара бэлиэтэммитэ. Маныаха “Векторга” вакцина алта арааһын чинчийэллэриттэн, үһэ ордугунан быһаарыллан, тургутан, боруобалаан көрүү түһүмэхтэрин ааста диэн буолбут. Оттон доруобуйа харыстабылын аан дойдутааҕы тэрилтэтин салайааччыта Тедрос Гебрейесус этэринэн, коронавирус 141 вакцината чинчийиллэр.
Егор Карпов, «Саха сирэ» хаһыат, edersaas.ru
Хаартыска ТАСС