Уус Алдан улууһун педагогтарын баалларыгар бастыҥ учууталлары уонна баспытааталлары ааттаатылар. Баал кэмигэр аһымал аахсыйа тэрийэн, олох уустук балаһыанньатыгар түбэспит оҕолорго анаан 287 тыһ. солк. хомуйдулар.
Сыл түмүгүн таһаарар педагогтар баалларыгар улуус бастыҥ учууталларын, баспытааталларын быһаардылар. Ол курдук, 38 ситиһиилээх педагог араас номинацияҕа тиксэн үөрдүлэр-көттүлэр, үгүс сыралара сыаналанна.
Үөрүүлээх тэрээһиҥҥэ мустубуттары улуус баһылыга Алексей Федотов уонна үөрэх управлениетын начальнига Ирина Тарская эҕэрдэлээтилэр. Кинилэр учуутал кыһамньылаах үлэтинэн үгүс үөрэнээччи өрөспүүбүлүкэ, Арассыыйа таһымнаах куонкурустарга ситиһиилээхтик кыттыбыттарын, төрөөбүт улуустарын аатын чиэстээхтик көмүскээбиттэрин бэлиэтээтилэр. Сыл түмүгүнэн Тумул орто оскуолата уонна Уус-Күөлүн оҕо саада бастыҥнарынан ааттаннылар.
Баал кэмигэр аһымал аахсыйа тэрийэн, педагогтар 287 450 солк. хомуйдулар. Бу харчы олох уустук балаһыанньатыгар түбэспит оҕолорго бэлэххэ барыаҕа.
Дьулустаан Сергеев,
Уус Алдан улууһун дьаһалтатын пресс-сэкирэтээрэ.