Дьэ уонна хоруупсуйаны утары охсуһабыт диэн араатардааҥ! Ураты бөдөҥ кээмэйдээх бэриги ылыыга, түөкүннээһиҥҥэ, сулууспатын балаһыанньатынан туһанан албыннааһыҥҥа буруйдаммыт киһи усулуобунай миэрэнэн эрэ накаастанна! Бириигэбэр сокуоннай күүһүгэр киирбит!
2018 сыл олунньутугар Уус Маайа улууһун урукку баһылыга Юрий Боярскайга үс холуобунай дьыала тэриллибитэ — ураты бөдөҥ кээмэйдээх бэриги ылыы, түөкүннээһин, сулууспатын балаһыанньатынан туһанан албыннааһын. Ити дьыалалар биир дьыалаҕа холбонон, 2018 сыл алтынньытыгар суут көрүүтүгэр барбыттара.
Боярскайы үлэлиир кабинетыгар УФСБ оперативниктара тутан илдьэ барар видеолара сонуннары киэҥник иһитиннэрэр уонна социальнай ситимнэринэн тарҕаммыта.
Бүгүн Дьокуускай куорат федеральнай суутун пресс-сулууспата иһитиннэрбитинэн, дьыала көрүллэн бүтэн, бириигэбэр муус устар 5 күнүгэр тахсыбыт итиэннэ уон күн ааһыыта күүһүгэр киирбит. Боярскай оҥорбут буруйун толору билиммит.
Суут кинини предпринимательствоҕа сокуоннайа суох кыттыыга, түөкүннээһиҥҥэ уонна сулууспаҕа албыннааһыны оҥорууга (икки эпизод) буруйдааҕынан билинэн, 4 сыл 6 ыйга көҥүлүн быһары усулуобунайынан ааҕан, 4 сыл тургутар болдьоххо уурбут.
Ону таһынан, 50 тыһ. солк. сууммалаах ыстараап төлүөхтээх, уонна 3 сыл устатыгар судаарыстыбаннай сулууспа уонна олохтоох салайыныы уорганнарын дуоһунастарыгар үлэлиир бырааба быһыллыбыт.
Суут быһаарбытынан, 2016 сыллаахха Юрий Боярскай улуус баһылыгынан үлэлиир кэмигэр индивидуальнай предприниматели кытта 2,7 мөл. солк. сууммалаах үс сымыйа муниципальнай хантараак түһэрсибит. Уус Маайа улууһугар суолу оҥорууга, өрөмүөннээһиҥҥэ.
Биһиги корр., «Саха сирэ» хаһыат, edersaas.ru
Хаартыска: http://yakutsk.ru/