Уус Маайаҕа тыа хаһаайыстыбата сайдыаҕа

Ааптар: 
Бөлөххө киир:

Уус Маайа улууһугар тыа хаһаайыстыбатын салаатын сайыннарыыга боччумнаах былааннар ылылыннылар.

edersaas.ru.
Ил Дархан Айсен Николаев Уус Маайаҕа сырыытын түмүгүнэн ыытыллыбыт улуус социальнай-экономическэй сайдыытын боппуруостарыгар анаммыт сүбэ мунньахха тыа хаһаайыстыбатын салаата улахан болҕомтоҕо турда.


Сүрүн иһитиннэриини оҥорбут улуус баһылыга Александр Антипин этэринэн, тыа хаһаайыстыбатын үлэтэ-хамнаһа 2024 сылга диэри кэми хабар тустаах бырагыраама чэрчитинэн салайыллар. Улуус сирэ-уота хортуоппуйу уонна оҕуруот аһын үүннэрэргэ олус табыгастаах. Өрөспүүбүлүкэ хотугулуу-илиҥҥи түбэтин хортуоппуйун, оҕуруотун аһын 38 %-а чуолаан манна олордуллар. Бас билии көрүҥүттэн тутулуга суох хаһаайыстыбалар 174 гектар бааһынаҕа үлэлииллэр. Салаа өссө сайдар-кэҥиир кыахтаах диэн, улуус дьаһалтата оҕуруот аһын уонна хортуоппуйу олордууну кэҥэтэр, ходуһа сирин тупсаран оҥорор уонна оҕуруот аһын харайар ыскылааты тутарга былаанныыр. Маҥнайгы хардыы баар – судаарыстыба чааһынай биисинэһи кытары бииргэ үлэлээһинин чэрчитинэн, “ЛОРП” ПАУо-ну кытары түһэрсиллибит сөбүлэһиинэн, быйыл Сүһэй диэн сиргэ 500 туонна оҕуруот аһын харайар ыскылаат тутуллуохтаах.


Улуус киинин уонна чугастааҕы нэһилиэктэр хаһаайыстыбалара сүрүннээн Петропавловскай аттынан, Хоҥку уонна Муокуйа үрэхтэр тардыыларынан оттууллар. Сирэ-уота кыараҕаһынан тиэхиньикэни туһанар кыаллыбат эрээри, ходуһаны төрдүттэн тупсаран оҥордоххо, бу сиртэн 400 ынах сүөһү иитэр оту холкутук хааччыныахха сөп. Хаһаайыстыбалар 2022 сылга диэри ынах сүөһү, сылгы уонна көтөр ахсаанын элбэтэн, эти оҥорууну 181 туоннаттан 214 туоннаҕа диэри, үүт баалабай ыамын 924 туоннаттан 980 туоннаҕа диэри тиэрдэр соруктаах үлэлии-хамсыы сылдьаллар.


—Нэһилиэнньэни олохтоох этинэн-үүтүнэн уонна оҕуруот аһынан хааччыйар инниттэн улууска тыа хаһаайыстыбатын сайыннарыыга ис кыахтар бааллар. Табаары оҥорооччулар бородууксуйа оҥоруутун элбэтэр, бэйэни хааччынар туһунан кэпсэтэллэрэ үчүгэй. Биһиги кинилэри өйүөхпүт, араас судаарыстыбаннай бырагыраамаларга кыттар кыахтары биэриэхпит, — диэтэ Айсен Николаев итиэннэ мелиоративнай үлэни тэрийиигэ тыа хаһаайыстыбатын министиэристибэтигэр сорудах биэрдэ диэн Ил Дархан уонна Бырабыыталыстыба дьаһалтата иһитиннэрэр.

Раиса Сибирякова, «Саха сирэ» хаһыат, edersaas.ru.

+1
0
+1
0
+1
0
+1
0
+1
0
+1
0
+1
0