Уус Маайа уруккутун курдук бөдөҥ бырамыысыланнай оройуон буолуон сөп. Ол туһунан Ил Дархан Айсен Николаев улууска кэлэ сылдьан эттэ. Оройуон социальнай-экэнэмиичэскэй сайдыытыгар анаммыт мунньахха бырамыысыланнас сайдыытын дьүүллэстилэр.
edersaas.ru
Урукку дьылларга Уус Маайаҕа кыһыл көмүһү туоннанан хостоон, дойду көмүскэ стратегическай саппааһын толороллоро. Бырамыысыланнас көмөтүнэн олохтоох авиация, суол-иис сулууспата сайдан испитэ, социальнай уонна инфраструктурнай эбийиэктэр тутуллубуттара. Ол эрэн Сэбиэскэй Сойуус ыһылларыгар балаһыанньа тосту уларыйбыта. Өскөтүн 1990-ус сыллар саҥаларыгар айылҕа баайын туһаҕа таһаарааччылар сылга 5 туонна көмүһү хостуур көрдөрүүлэрэ 2010 сылга 1083 киилэҕэ диэри түспүтэ.
Күн бүгүн Уус Маайаҕа 8 хампаанньа үлэлиир: «Дражник», «Поиск», «Джугджур-А», «Рудник Дуэт», «Бриндакит», «Заря+М», «Ыныкчаан көмүһэ» уонна «Томпо-Аурум». 2019 сыл түмүгүнэн кинилэр 2252 киилэ көмүһү хостообуттар.
Көмүсчүттэр сүрүн кыһалҕалара — минеральнай-сырьевой саппаас аччааһына, ол эрэн геологтар чинчийэр үлэни ыыттахтарына, көмүһү эрэ буолбакка айылҕа атын баайын эмиэ туһаҕа таһаарыахха сөп диэн Айсен Николаев инникигэ эрэлин биллэрдэ.
Кини этэринэн, Уус Маайаҕа ойуур бырамыысыланнаһа сайдыан сөп. Бырамыысыланнаһы сайыннарарга бастатан туран, суол-иис оҥоһуллуон наада. 2020 сылга Дьокуускай – Амма – Уус Маайа – Элдьикээн – Югоренок хайысхатынан суол салгыы тутуллуо. Амма уонна Элдьикээн икки ардыгар понтуон муоста баар буолуо.
«Саха сирэ», edersaas.ru