Уус Алдаҥҥа оҕотун кырбаабыт кырыктаах аҕаҕа холуобунай дьыала тэрилиннэ (ВИДЕО)
Маай бырааһынньыктарыгар Уус Алдан улууһун киинигэр Бороҕоҥҥо кырыктаах төрөппүттэр 10 саастаах уолларын илдьи кырбаабыттарын туһунан хобдох сурах бастаан социальнай ситимнэринэн тарҕаммыта. Дьиҥ чахчы хайдаҕый?
Бу туһунан РФ ИДьМ-тын официальнай бэрэстэбиитэлэ, полиция полковнига Ирина Волк иһитиннэрдэ.
Уус Алдан улууһун Ис дьыалаҕа отделын дознавателэ «суһал көмө» суоппарынан үлэлиир 32 саастаах киһиэхэ РФ Холуобунай кодексатын 112-с ыст. 1 чааһынан холуобунай дьыала тэрийдэ. Бу киһи итирэн баран, 9 саастаах уол оҕотун кырыктаахтык кырбааһыҥҥа уорбаланар.
Ол курдук, ыам ыйын 6 күнүгэр, түүн 03.00 чааска полицияҕа балыыһаттан иһитиннэрии киирбит. Улаханнык кырбаммыт, ол иһигэр, сирэйин, төбөтүн уҥуохтара тостубут 9 саастаах оҕо киллэриллибитин туһунан.
Балыыһаҕа тута сокуоннай саастарын ситэ илик оҕолор дьыалаларыгар иниспиэктэр тиийбит.
Уолчааны суһаллык Дьокуускай куоракка ыыппыттар, тута бэрэбиэркэ саҕаламмыт.
Бэрэбиэркэ быһаарбытынан, оҕону аҕата итирдэҕинэ, ийэтэ да баарыгар, куруук кырбыыр-атаҕастыыр эбит. Ол эрэн, ыалларыттан да, оскуолаттан да туох да иһитиннэрии полицияҕа маныахаҕа диэри киирбэтэх.
Бэҕэһээ, ыам ыйын 16 күнүгэр, экспертиза түмүктэрэ биллээтин, холуобунай дьыала тэриллибит.
Билигин уолчаан киин куорат балыыһатыгар эпэрээссийэлэнэн сытар…
Биһиги корр., «Саха сирэ» хаһыат, edersaas.ru
Хаартыска интэриниэттэн, видео РФ ИДьМ-та.