Уус Алдаҥҥа 100 сааһын туолбут ытык кырдьаҕаһы эҕэрдэлээтилэр

Ааптар: 
Бөлөххө киир:

Кэптэнигэ Лөгөй нэһилиэгин Бочуоттаах олохтооҕун, тыыл, үлэ бэтэрээнин Ульяна Петровна Пестрякованы үйэлээх үбүлүөйүнэн үөрэн-көтөн тураннар итиитик-истиҥник эҕэрдэлээтилэр. 


Үбүлээргэ РФ Бэрэсидьиэнэ Владимир Путин, СӨ Ил Дархана Айсен Николаев, Уус Алдан улууһунааҕы социальнай көмүскэл управлениетын эҕэрдэлэрин, «Үйэ саас» бочуоттаах бэлиэни үөрүүлээх быһыыга-майгыга туттардылар.

Ульяна Петровна эрдэ тулаайах хаалан, оҕо сааһыттан үлэҕэ уһаарыллыбыт, миккиллибит. Сэттис кылааска үөрэнэ сылдьан оскуолаҕа баһаатайдаабыт, онтон төрөөбүт улууһугар Уус Алдаҥҥа райпоҕа суот-учуот үлэтигэр, Аҕа дойду Улуу сэриитин сылларыгар босуобуйалары үллэриигэ иниспиэктэр курдук улахан эппиэтинэстээх үлэҕэ сылдьыбыт. Төһө да аас-туор олох буоллар, Ульяна Петровна уопсастыбаннай үлэттэн туора турбатах. Агитбиригээдэлэринэн кэнсиэртээх, лиэксийэлээх оройуоннарынан элбэхтэ сылдьыбыттар, үлэһит дьону-сэргэни көрсүбүттэр. Ульяна Петровна иллээх ыал, улахан дьиэ кэргэн, киэҥ аймах ытык киһитэ, тапталлаах эбээ, хос эбээ.

Ил Дархан Айсен Николаев эҕэрдэ суругар Ульяна Петровнаҕа  төрөөбүт Уус Алданын улууһугар, Саха Өрөспүүбүлүкэтигэр өр сыллаах эҥкилэ суох үлэтин, социальнай-экэнэмиичэскэй сайдыыга кылаатын иһин махтанар.

Ульяна Петровна эҕэрдэни улаханнык долгуйан, үөрэн туран иһиттэ уонна хардары улахан махталын тиэртэ. Эдэр сааһын ахтан-санаан ылла, ырыа ыллаан дьиэрэттэ. Дьон-сэргэ ытыктабылыгар сылдьар ытык кырдьаҕас иккис сылын кыһынын хос сиэнигэр долгуйар Москва куоракка кыстыыр.

СӨ Ил Дарханын уонна СӨ Бырабыыталыстыбатын пресс-сулууспата. 

+1
0
+1
0
+1
0
+1
0
+1
0
+1
0
+1
0