Усуйаана: кытаанах кыстык содула

Бөлөххө киир:

Усуйаана улууһугар толорор былаас отчуоттуур бөлөҕүн нэһилиэнньэҕэ куттал суоһаабатын хааччыйар судаарыстыбаннай кэмитиэт бэрэссэдээтэлэ Юрий Зайцев салайда. Ыраах сытар, суола-ииһэ суох улуус буоларынан, бөлөх икки аҥы хайдыһан, тус-туспа үлэлээтилэр. Лаптевтар муораларын аттыгар сытар нэһилиэктэр улуус кииниттэн 500-600 килэмиэтир ыраах сытар буолан, Уус Куйга өттүгэр иккис бөлөх кэлэр нэдиэлэттэн саҥа үлэлии көтөр.

Ангелина Васильева, «Cаха сирэ» хаһыат, edersaas.ru
Нэһилиэнньэ саамай туруорсар боппуруоһунан Интэриниэт, суотабай сибээс хаачыстыбатын мөлтөҕө буолла. Хас нэһилиэк аайы бу боппуруоһу көтөхтүлэр. Ол гынан баран, хомойуох иһин, чугастааҕы сылларга сибээс хаачыстыбата тупсара биллибэт эбит.
Уйаандьылар “Янзолото” хампаанньа аҕыйах ахсааннаах норуоттар олорор-үлэлиир сирдэрин тыыппатын, алдьаппатын, маны салалта хонтуруоллуурун туруорустулар. Ону тэҥэ нэһилиэккэ хас да сылы быһа кыаллыбатах этнокиин тутулларыгар эрэллэрин биллэрдилэр.

Оскуола дириэктэрэ Альбина Колесова туран, үс сыллааҕыта учууталлар олорор усулуобуйаларын тупсарары туруорсубутун санатта. Билигин дьиэлэригэр өрөмүөн ыытыллан, ититиигэ холбонон, усулуобуйа быдан тупсубут. Онон Альбина Михайловна бырабыыталыстыбаҕа махтанна.
Силээннээх нэһилиэгэр, төһө да хочуолунайга оттук икки нэдиэлэлээх эрэ саппааһа хааллар, олохтоохтор олус аймаммакка көрүстүлэр. Бырабыыталыстыба бөлөҕөр кыһыннары-сайыннары сылдьар суол тутулларын, сэлиэнньэ аҥарын ититиигэ холбууру туруорустулар. Бу эмиэ хаһыс да сылын көтөхпүт боппуруостара. Ол эрэн, туруоруллар боппуруос сороҕо олоххо киирэр. Оскуолаҕа, балыыһаҕа хапытаалынай өрөмүөнү ыытыы кыаллыах курдук буолбут. Оҕо саадын саҥа дьиэтин тутууга бырайыактыыр үлэ барыахтаах.

Кытаанах кыстык кэлэн, кыайан оттоппокко, үгүс дьон сүөһүлэрин идэһэлэнэргэ күһэллибиттэр. От тиийбэккэ, сылгы, ынах ыран охтуута баар. Нэһилиэккэ 354 сылгыттан 274-дэ, 88 сүөһүттэн 67-тэ, 28 сибиинньэттэн 14-дэ ордубут. Онон бу күннэргэ сүөһүгэ эбии аһылык, от кэлэрин күүтэллэр.
Салгыы маннык боппуруостар киирдилэр: чох хаачыстыбата мөлтөх; кулууп олус тымныы, хаһан өрөмүөн ыытыллар? Сайын бөртөлүөт расписаниета суох, таарыйбакка ааһан, ыйы-ыйынан хаайтарабыт; биэнсийэ хойутаан кэлэр, буоста куһаҕаннык сылдьар, о.д.а.

Түмүккэ элбэх оҕолоох ийэлэр Венера Рожина уонна Лира Ефимова туран, биэс оҕолоохторго көмөлөһөр бырагыраама чэрчитинэн, Дьокуускай куоракка дьиэ ылбыттарыгар махталларын тиэртилэр.


Депутатскайга оҕо саадыгар миэстэ тиийбэтин бэлиэтээтилэр. 120 миэстэҕэ 240 оҕо баар эбит.
СХПК салайааччыта Гаврил Барабанскай балыктыыр кооператив сорох сылларга субсидияны ылбатаҕын эттэ. “Ороскуоппут элбэх, бензин ыарыы турар. Балыкпытын 110-120 солкуобайга эрэ туттарабыт, ону Дьокуускайга илдьэн 600-700 солкуобайга атыылыыллар. Былырыын ситэ ылбатах субсидиябытын быйыл ылыахпыт дуо?” диэн ыйытта.
Онуоха Арктика дьыалаларыгар судаарыстыбаннай кэмитиэт бэрэссэдээтэлэ Алексей Киселев маннык эппиэттээтэ:
—Былырыын балык хаһаайыстыбатыгар 56 мөл. солкуобай көрүллүбүтэ. Быйыл үрдээн, 70 мөл. солк. түҥэтиэхпит. Онон, ордор түгэнигэр, ити хаалбыт иэһи төлүүргэ кыһаллыахпыт.

Ангелина Васильева, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0