Устудьуоннары үлэлииргэ үөрэтэллэр

Ааптар: 
Бөлөххө киир:

Орто үөрэх кыһаларыгар устудьуоннары сатабылга, дьоҕурга үөрэтэр уонна олоххо бэлэмнээх дьону иитэн таһаарар туһугар былырыыҥҥыттан “Учись работать в Якутии” бырайыак саҕаламмыта.

edersaas.ru

СӨ Үөрэҕин уонна наукатын министиэристибэтэ орто анал үөрэх кыһаларын хабарга быһаарбыта. Манна биэс тэрилтэ киирэр – Жатайдааҕы техникум, Дьокуускайдааҕы сервис технологическай техникума, Тыа хаһаайыстыбатын техникума, Намнааҕы техникум уонна Дьокуускайдааҕы финансовай-экэнэмиичэскэй кэллиэс. Устудьуоннар маастардар көмөлөрүнэн үөрэтэр-оҥорон таһаарар былаһааккаларга ас, миэбэл, иис, тыа хаһаайыстыбатын бородууктатын уонна араас өҥөлөрү оҥороллор.

Бырайыак олоххо киириитин хаамыытын көрдөрөр сыаллаах суруналыыстарга икки орто үөрэх кыһатыгар пресс-тур тэрийдилэр. Биһигини миниистири бастакы солбуйааччы Михаил Присяжнай бэйэтинэн арыаллыыр.

Жатайдааҕы техникум

Массыынабыт Жатайдааҕы техникум ааныгар тиийэн тохтоотун кытта бары иһирдьэ кутуллан киирэбит. Биһигини дириэктэр Алена Морозова үөрэ-көтө көрсөр.

— Бырайыакка үөрүүнэн кыттыспыппыт. Тоҕо диэтэххэ, биһиги оҥорон таһаарыыбыт кыаҕын ылан эрэр. Килиэп, буулка, кондитерскай ас, остолобуойбутугар өҥө, миэбэл оҥоруутун хайысхаларын киллэрдибит”, — диэн кэпсээнин саҕалыыр.

Нэһилиэнньэҕэ, тэрилтэҕэ миэбэл оҥорон удамыр сыанаҕа атыылыыллар эбит. Бэйэлэрэ туһанар миэбэллэрин этэ да барыллыбат. Олоп­постон саҕалаан, купе-ыскаапка тиийэ барыта бэйэлэрин гиэнэ.

Асчыттар лабораториялара

Маҥнай кондитердары бэлэмниир хоско киирэбит. Үһүс куурус устудьуоннара демо-эксээмэҥҥэ бэлэмнэнэ сылдьаллар. Муора бородууктатыттан сокуускалары уонна фокачча лэппиэскэни бэлэмнииллэр. Симиэнэ түөрт чаас устата үөрэнэр. Бу кэмҥэ бэлэмнээбит астарын бэйэлэрин буфеттарыгар, остолобуойдарыгар туттаран нэһилиэнньэҕэ атыылыыллар. Аттынааҕы дьиэҕэ тахсыбыппыт, быраактыкаларын бара сылдьар биэкэрдэр килиэп астаан, булочка буһаран буһа-хата сылдьаллар.

Миэбэл мастарыскыайа

Миэбэл мастарыскыайыгар баран иһэн буфеты таарыйабыт. Жатайдар бурдук аһы мантан атыылаһаллар, эбиитин үссэнэн ааһаллар эбит. Мастарыскыайга киирбиппит, тимир олоппос, орон атахтара тус-туспа кыстаммыттар. Үөрэх тэрилтэлэриттэн, Жатайдааҕы техникум эрэ миэбэли оҥоруунан дьарыктанар. “Бүгүҥҥүтэ улахан сакааспыт бүттэ, кыралар хааллылар”, — дэһэллэр.

Улаханы үлэлээбит дьон быһыытынан, салгыы Дьокуускайдааҕы сервис технологическай техникумугар аттанабыт. Бу күн уопсайа кинилэр үс баазаларын көрдүбүт.

Дьокуускайдааҕы сервис технологическай техникума

Паарка хот-дога!

Куорат саамай минньигэс хот-дога пааркаҕа баарын билэр инигит?! Бука, амсайбатах киһи диэн суоҕа буолуо. Буулкатын Дьокуускайдааҕы сервис технологическай техникумун устудьуоннара астыыллар эбит. Ол да иһин, массыынаттан түһээппитин кытта кыра мас дьиэттэн минньигэс сыт саба биэрэр. Килиэп, буулка арааһа манна толору.

Гостиница

Үөрэтэр-производственнай гостиница салайааччыта, WorldSkills эксперэ Анатолий Горопаев иһитиннэрбитинэн, биирдии-иккилии миэстэлээх уонна үрдүк комфортаах нүөмэрдэр бааллар эбит. “Билиҥҥитэ иллэҥ нүөмэр суох. Гостиница олохтооҕо хайдах баҕарарынан, киэһээҥҥи аһылыгар тиийэ барытын бэлэмниибит”, — диэн кэпсиир. Биир миэстэлээх нүөмэри көрдөрбүттэрэ, иһигэр холодильниктан саҕалаан сотторугар тиийэ барыта бэлэмнэммит. Сыаната баара-суоҕа, хонугар 500 солк.! Миэбэллэрин ыраата барбакка, Жатайдааҕы техникумҥа сакаастаабыттар. Оттон утуйар таҥаһын, түннүк сабыытын бэйэлэрин устудьуоннара тикпиттэр. Манна анал үлэһит диэн суох. Ыалдьыты көрсүүттэн саҕалаан, барытын устудьуоннар үөрэнэ таарыйа бэйэлэрэ хааччыйаллар. Аттынааҕы хоско парикмахерскай баар. Онно аны күһүҥҥүттэн социальнай парикмахерскайы арыйан үлэлэтэр санаалаахтар.

Чэпчэки өҥө

Салгыы остолобуойга ааһабыт. Коктейль ийэтэ-аҕата дьэ, манна баар эбит. Били, тэлэбиисэргэ курдук хастыы даҕаны эрээтинэн араас коктейль кыстанан турар. “Суруналыыстар, баһаалыста, амсайыҥ”, — диэн биһигини күндүлүүллэр. Минньигэһиин! Ааҕааччыларбытыгар биир кистэлэҥи арыйабыт, куорат үрдүнэн торду астааһыҥҥа маастар-кылааһы саамай чэпчэки сыанаҕа тустаах үөрэх кыһатын маастардара биэрэллэр, ону ааһан, оскуола үөрэнээччилэригэр анаан Аһаҕас аан күннэрин ыыталлар эбит. Эбиитин сайаапканан ханна ыйбыт сиргитигэр тиийэн банкеттары, фуршеттары тэрийэллэр. Өрүү сакаастыыр килийиэннэрдээхтэр эбит. “Ол иһин, бэл диэтэр, эрэкэлээмэҕэ наадыйбаппыт. Нэдиэлэ аайы сакаас толору”, — дэһэллэр.

Иистэнэр сыахха

Уонча иистэнэр массыынаҕа эдэркээн устудьуон кыргыттар асчыттарга аналлаах баартыктары тигэн тигинэтэ олороллор.

Түмүк

Куһаҕан үчүгэйдээх диэбиккэ дылы, тас дойдулар Арассыыйаҕа санкция биллэрэн, бэйэбит оҥорон таһаарааччыларбытын өйүүр инниттэн араас бырайыактар олоххо киирэллэр. Олортон биирдэстэринэн “Учись работать в Якутии” бырайыак буолар. Биһиги кэрийэн көрбүт хас биирдии сыахпытыгар барыта устудьуоннар илиилэрин иһинэн ааспыт оҥоһуктар. Этиллибитин курдук, сыаналара маҕаһыыннааҕар быдан чэпчэки. Оттон хаачыстыбата араас ааттаах-суоллаах фирмалартан итэҕэһэ суох.

Людмила ПОПОВА, “Саха сирэ” хаһыат, edersaas.ru

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0