Бу күннэргэ Нуучча географическай уопсастыбатын Саха сиринээҕи салаатын иһинэн “Өлүөнэ өрүһүнэн устар университет” бырайыак этэрээтэ Дьокуускайынан, Намынан, Кэбээйинэн, Эдьигээнинэн уунан устан айаннаан, Булуҥ улууһугар тиийдэ.
edersaas.ru
Эcпэдииссийэ салайааччыта Розалия Иванова бэлиэтээбитинэн, Тиксиигэ этэрээт үс хонуоҕа:
— Улуус дьаһалтатын салайааччыларын, нэһилиэнньэни кытта көрсөн баран, эспэдииссийэ сорох чилиэннэрэ сүрүн соруктарын толорон, Тиксии бөһүөлэгин чугаһынааҕы сири-уоту чинчийиэхтэрэ. Онно устудьуоннар буор, муус, уу боруобатын ылыахтара.
Сорохтор Аҕа дойду сэриитин саҕана балык бырамыысыланнаһа сайдыытыгар сыһыаннаах докумуоннары үөрэтиэхтэрэ. Этэрээппитигэр географ, эколог, гидролог, историк, социолог, фармацевт, этнолог идэлэри баһылаары сылдьар устудьуоннар баар буолан, хас биирдиилэрэ бэйэлэрин хайысхаларынан үлэлииллэр. Атырдьах ыйын 1 күнүгэр Новосибирскай арыыларга баран эспэдииссийэ чилиэннэрин кытта көрсүөхпүт. Онно Нуучча географическай уопсастыбатын Саха сиринээҕи салаатын үлэтин ис хоһоонун билиһиннэриэхпит. Ол кэннэ уопсастыбабыт Булуҥнааҕы олохтоох тэрилтэтин кытта көрсүһүөхпүт. Төрдүс күммүтүгэр эмиэ научнай хайысхалаах үлэбитин салгыы ыыта-ыыта, киин куораппытыгар төннүөхпүт, — диэн кэпсиир эспэдииссийэ салайааччыта.
“Өлүөнэ өрүһүнэн устар университет” устудьуоннар бырайыактарын этэрээтэ төннөн иһэн Булуҥ улууһун Күһүүрүгэр, Эдьигээҥҥэ, Кэбээйи Сангаарыгар уонна Батамайыгар тохтоон чинчийии үлэтин ыытыахтара.
Быковскай, Тиит Арыы, Чекуровка, Сииктээх, Дьардьаан, Промышленнай, Нам, Граф Биэрэгэ, Кангалас уонна Жатай курдук нэһилиэнньэлээх пууннарга кылгастык тохтоон ааһыахтара. Этэрээт чилиэннэрэ атырдьах ыйын 18-19 күннэригэр Дьокуускай куораты булар былааннаахтар.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернет ситимиттэн.