Устудьуоннар коронавируһу чэпчэкитик аһарааччылары эмтиир салааҕа сыталлар
М.К.Аммосов аатынан Хотугулуу-Илиҥҥи федеральнай университет 9/2 кампуһун уопсайыгар, ыам ыйын 4 күнүгэр биир устудьуон коронавируһунан ыалдьыбыта бигэргэнэн, харантыын биллэриллибитэ. Бүгүн эбии 30 устудьуон ыалдьыбыта билиннэ.
Ректор Анатолий Николаевтан тустаах түгэҥҥэ санаатын үллэстэригэр көрдөспүппүтүгэр: “Ыалдьыбыт дьон бары чэпчэкитик аһарыналлар. Ол иһин ыалдьыбыттарын тута билэр уустук этэ. Медиктэрбит өрүү кэтээбиттэрэ үчүгэй. Маҥнай ОРВИ сибикилээх дьону көрбүттэрэ-истибиттэрэ. Онон бастакы ыалдьыбыт киһи биллибитэ.
Тустаах уопсайга тута харантыын биллэрбиппит. Ыарыы салгыы тарҕаныытын бохсор туһуттан хосторуттан таһаартаабаппыт. Бүгүн, ыалдьыбыт устудьуоннары аҕыйахтыы бөлөҕүнэн Губин уулуссатын 5-с нүөмэрдээх аадырыһыгар турар уопсайбыт баазатыгар тэриллибит, ыарыыны судургутук аһарынар ыарыһахтарга анаммыт салааҕа илтибит. Маныаха университет оптуобуһун туһанныбыт. Маҥнай манна обсерватор аһар санаалаах этибит. Ол эрээри, балаһыанньа уларыйан, өрөспүүбүлүкэтээҕи ыстаап коронавируһу судургутук аһарынар дьоҥҥо аналлаах салааны аһарга быһаарда.
Билигин, 300-чэкэ анаалыстан 60-тан тахса анаалыс түмүгэ биллибэккэ турар. Ону кэтэһэбит. Ыалдьыбыт киһи ахсаана эбиллибэтигэр эрэнэбит. Ыарыыны бохсон уонна уопсайга харантыыны биллэрэн, ыам ыйын 20-с күннэригэр харантыын түмүктэнэригэр эрэнэбит”, — диэн Эдэр саас сайт ааҕааччыларыгар иһитиннэрдэ.
Уопсайга миэстэтигэр олорор устудьуоннар волонтердууллар. Университет итии аһылыгынан хааччыйар. Эбии дезинфекциялыыр сириэстибэлэри атыыласпыттар. Иккилии чаас буола-буола барыта сууйуллар, сотуллар.
Людмила ПОПОВА, «Саха сирэ» хаһыат, edersaas.ru
Хаартыска: ХИФУ саайтыттан