Устудьуоннар этэрээттэрэ тыа хаһаайыстыбатын үлэтигэр көмөлөһөргө бэлэмнэр...
Олох-дьаһах

Устудьуоннар этэрээттэрэ тыа хаһаайыстыбатын үлэтигэр көмөлөһөргө бэлэмнэр

Ааспыт сайын-күһүн тыа хаһаайыстыбатын үлэтигэр устудьуоннар этэрээттэрин 534 байыаһа көмөлөстө. Кинилэр, сүрүннээн, хортуоппуй хомууругар үлэлээтилэр.

Ол курдук, саамай элбэх устудьуон Өлүөхүмэ улууһугар сырытта. “Саҥыйахтаах” хаһаайыстыба бааһынатыгар 259 эдэр ыччат үлэлээбититтэн 223-э Тыа хаһаайыстыбатын академиятыгар, 36-та Өлүөхүмэтээҕи профучилищеҕа үөрэнэллэр. Ону сэргэ Нам улууһугар 57, Мэҥэ Хаҥаласка 15, Хаҥаласка 117, Томпоҕо 16 устудьуон хортуоппуй үүнүүтүн үмүрүтүстүлэр.

Маны таһынан 40 байыас хаһаайыстыбалары кытта быһаччы кэпсэтэн, күрүө тутуутугар үлэлээтэ. Уолаттар ортотунан 25-тии тыһыынча солкуобайы ааҕыстылар. Сайыҥҥы уһун, күүстээх ардахтан эмсэҕэлээбит Өймөкөөн улууһугар 30 байыас тиийэн, от үлэтигэр көмөлөстө. Кинилэр Сордоҥноох, Томтор уонна Өймөкөөн нэһилиэктэригэр оттоотулар.

Тыа хаһаайыстыбатын министиэристибэтэ быйыл эмиэ устудьуоннар күүстэрин күрүө тутуутугар, от уонна хомуур үлэлэригэр туһанар былааннаах. Хаһаайыстыбалар киллэрбит сайаапкаларынан көрөн, сотору кэминэн үлэ кээмэйин торума оҥоһуллуо. Устудьуоннар этэрээттэрин хамандыырдара уонна хамыһаардара тыа хаһаайыстыбатын миниистирин солбуйааччы Николай Афанасьевтыын көрсөллөрүгэр көмөлөһөргө бэлэмнэрин биллэрдилэр.

Василий НИКИФОРОВ.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

15 − девять =