Устудьуоннар үлэлииллэрэ сокуонунан көҥүллэниэҕэ...
Олох-дьаһах - Эдэр саас

Устудьуоннар үлэлииллэрэ сокуонунан көҥүллэниэҕэ

Коронавирус Арассыыйаҕа тарҕаммыта аҕыйах ый буолла эрээри, олоххо, сокуоҥҥа кытта уларытыылары таһааран эрэр. Олортон биирдэстэринэн — устудьуоннар үлэлииллэрин көҥүллээһин.

edersaas.ru

Арассыыйаҕа ханна баҕарар учуутал тиийбэт кыһалҕата баар. Саха сиригэр эмиэ сыллата 800 кэриҥэ вакансия аһаҕас буолар. Тустаах кыһалҕаны быһаарар инниттэн араас дьаһаллары ылаллар, бырайыактары толкуйдууллар. Ол эрээри, устудьуоннар үлэлииллэрин көҥүллээһин, биир үксүн коронавируһунан тэтимирдэ диэххэ сөп. Арассыыйаҕа балачча элбэх оҕо төлөөн үөрэнэр. Онтон сорохторо бэйэлэрэ үлэлээн уйуналлар. Ол эрээри, коронавирус кэккэ кыһалҕалары таһааран, устудьуоннар үлэтэ суох хааллылар, төлүүр кыахтара суох диэн кэлин элбэхтик этилиннэ. Онон икки кыһалҕаны быһаарар инниттэн, Судаарыстыбаннай Дуума бу нэдиэлэҕэ учуутал идэтигэр үрдүкү кууруска үөрэнэр устудьуоннар үлэлиэхтэрин сөп диэн сокуон барылын иккис, үһүс ааҕыыларга ылынна. “РФ Үөрэх туһунан сокуонугар” уларытыыны киллэрээри гыналлар.

Оччотугар сокуоҥҥа олоҕуран, учуутал буолаары сылдьар үһүс кууруһу бүтэрбит, “үөрэх уонна педагогическай наука” хайысхатыгар үөрэнэр устудьуоннар, дипломнарын ылыахтарын иннинэ оскуолаҕа үлэлиэхтэрин сөп буолар.  Ону тэҥэ, атын исписээлинэстэргэ үөрэнэр иккис кууруһу бүтэрбит устудьуоннар эбии үөрэхтээһин бырагырааматын биэриэхтэрин сөп. Холобура, уруок таһынан куруһуоктары, секциялары ыытыахтарын сөп.

Бу дойду бэрэсидьиэнин дьаһалларыттан биирдэстэрэ буолар. Аҕыйах хонуктааҕыта, быйыл олоххо киирбит, “Земскэй учуутал” бырагыраама түмүгэ тахсыбыта. Уопсайа, 124 сайаапка киирбититтэн 18 кыайыылаах быһаарыллыбыта. Ону таһынан, “Арктика учуутала” бырагыраама олоххо киириэхтээх.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА) хаартыскаҕа түһэриитэ.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

три × один =