Саха сиригэр национальнай бырайыактарынан успуорт эбийиэктэрин тутуу кэмигэр бара турар. 2020 сыл бүтүүтэ икки тутуу үлэҕэ киирэрэ былааннанар. Бу туһунан СӨ успуорка уонна физическэй култуураҕа миниистири солбуйааччы Семен Чердонов иһитиннэрэр.
«Саха сиригэр судаарыстыбаттан үбүлэммит икки эбийиэк тутуута түмүктэнэн эрэр — Бэрдьигэстээххэ элбэх функуциялаах успуорт саала уонна Аллараа Бэстээххэ успуорт комплекса. Үлэ былаан быһыытынан бара турар, коронавирус пандемията мэһэйдээбэтэ. Ахсынньыга бу икки эбийиэк үлэҕэ киириэхтээхтэр», — диэн миниистири солбуйааччы этэр.
Бэрдьигэстээххэ 2,4 тыһыынча квадратнай миэтэрэ иэннээх успуорт саала тутулла турар. Манна 400 миэстэлээх тырыбына, 70 киһи дьарыктанар буоксалыыр уонна эрчиллэр саалалара баар буолуохтаах. 2021 сылга Горнайга XXI Манчаары оонньуулара ыытыллыаҕа. Оттон Аллараа Бэстээххэ икки этээстээх комплекс тутулла турар. Манна остуол оонньууларыгар анаммыт, тустуу уо.д.а. саалалара баар буолуохтара.
«Аллараа Бэстээххэ тутулла турар комплекска улуустааҕы, өрөспүүбүлүкэтээҕи күрэхтэһиилэр ыытыллыахтара. Манна биир симиэнэҕэ 182 киһи дьарыктаныан сөп буолуоҕа», — диэн Чердонов эбэн этэр.
edersaas.ru