Букатын өйдөммөт да дьон баар буолар эбит! Оҥорбуттарын син биир оҥоро тураллар. Кэһэлтэ буолуохтарыгар диэри. Биир оннук киһиэхэ суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Ол курдук, Удачнай куоракка мировой суут 25 саастаах киһиэхэ бириигэбэр таһаарбыт.
Суут быһаарбытынан, бу эдэр киһи арыгы иһэн баран, массыына ыыта сылдьан, хаста да административнай эппиэккэ тардылла сылдьыбыт. Ону таһынан, өссө атын буруйдары оҥорон, усулуобунай миэрэнэн сууттаммыт эбит.
Ити сууттаммытын хоҥоруутугар хоҥнорбокко, эмиэ соннук уруулга итирик олорон, сокуону хаттаан кэспит.
Суут кинини буруйдааҕынан билинэн, усулуобунай миэрэтин көтүрэн, 5 сыл 2 ыйга уопсай эрэсиимнээх холуонньаҕа көҥүлүн быһарга уурбут. Уонна 2 сыл устатыгар уруулга олорор быраабын быспыт.
Санатар буоллахха, уруулга арыгы иһэн баран олорбут суоппардар 2015 сыл от ыйын 1 күнүгэр диэри административнай эрэ эппиэккэ тардыллар этилэр. Онтон ити күнтэн саҕалаан, РФ Холуобунай кодексатыгар 264.1-с ыстатыйа эбиллибитэ. Бу ыстатыйаҕа олоҕуран, урукку өттүгэр уруулга итирик олорон административнай эпиэккэ тардылла сылдьыбыт киһи хаттаан оннук туруктаах түбэстэҕинэ, холуобунай эппиэтинэскэ тардыллар.
Холуобунай кодекс 264.1-с ыстатыйатын накаастабыл миэрэлэрэ:
200 тыһ. солк. — 300 тыһ. солк. диэри суумалаах ыстараап, 480 чааска диэри булгуччулаах босхо үлэлээһин, 2 сылга диэри көҥүлү быһыы. Итини таһынан, эбиитин 3 сылга диэри болдьоххо массыына ыытар бырааба быһыллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.