Коронавирус эпидиэмийэтинэн сибээстээн, Мэҥэ Хаҥалас Майатыгар эмиэ кэккэ хааччахтыыр дьаһаллар киирэннэр, тэрилтэлэр, оскуолалар, оҕо уһуйааннара, ырыынактар сабыллан тураллар.
edersaas.ru
«Өссө биир ый олоруох курдукпут. Быстах эрээри, устуук балаһыанньаҕа ордук аччыгый биисинэс тэрилтэлэрэ түбэстилэр», — диэн улуустааҕы уопсастыбаннай тэрилтэлэри сүрүннээччи Зиновий Игнатьев урбаанньыттар балаһыанньаларын билиһиннэрдэ.
Майа сэлиэнньэтин олохтооҕо, бэйэ дьыалатын тэринэн үлэлии сылдьар Галина Сергучеваны кытта кэпсэппит.
Урбаанньыт полиграфиянан дьарыктанар. Эбии «Майа Куо» диэн иистэнэр сыахтаах. «Максим» диэн ааттаах атыы-тутуу дьиэтигэр 30 атыыһыт үлэлии олорор эбит.
«Куортаммыт — ботуччу. Бары биэнсийэ уонна да атын нолуоктары кэмигэр төлүү олорбуппут. Ону таһынан, аһымал аахсыйаларга, араас тэрээһиннэргэ барытыгар кыттыһан, кыаммат дьоммутун өйүү сылдьыбыппыт. Дьэ, билигин сабыллан, үлэтэ суох олоробут. Оскуолаҕа үөрэнэр икки оҕолоохпун. Бүддьүөт тэрилтэлэрин үлэһиттэрэ хамнастарын толору ылаллар. Онтон биһиги хайдах буолабыт? Аҥаардас арендабытын да төлүүртэн санаабыт түһэр. Онон ыарахан кэммитигэр Ил Дархан урбаанньыттары өйүүр ыйааҕа олоххо киирэригэр эрэнэбит«, — диэн Галина Михайловна санаатын үллэстибит.
Бу күннэргэ аччыгый уонна дьоҕус биисинэскэ үлэлиир урбаанньыттар сэҥээрэр ыйытыыларыгар «Мин биисинэһим» кииҥҥэ 8-800-100-58-80 «итии лиинийэҕэ» эрийэн хоруй ылыахтарын сөп. Бу киин бэйэтин саайтыгар “COVID-19” өйөбүл миэрэлэрэ» диэн анал балаһаны арыйда. Онно нолуок, кирэдьиит, үлэни тэрийии, чэпчэтиилээх аренда, атыы-эргиэн, уопсай боппууруостарга хоруйдары биэрэллэр. Ким туох ыйытыылаах бу нүөмэргэ эрийэн билсиҥ.
Елена ПОТОЦКАЯ, «Саха сирэ» хаһыат, edersaas.ru