«Урбаан фабриката — оҕолорго» бэйэ дьыалатын арынан, дьоҕус бизнес салаатын сайыннарыыга туһуламмыт үөрэхтээһин бырайыага Арассыыйа 34 эригийиэнигэр үлэлиир.
edersaas.ru
Бырайыагы Саха сиригэр эмиэ актыыбынайдык үлэлэтэллэр. «Урбаан фабриката — оҕолорго» үөрэхтээһин бырайыага ХИФУ пединститутугар баазалаах. Урбаан эйгэтигэр сыстыан баҕалаах оҕолор ааттаах-суоллаах, дьоҕус бизнестэн саҕалаан, бөдөҥ бизнесмеҥҥэ тиийэ үүммүт урбаанньыттары кытта көрсүһэллэр, кинилэр маастар кылаастарыгар сылдьаллар.
Доруобуйаларыгар хааччахтаах инбэлиит оҕолор доруобуйаларын тупсарар кииҥҥэ өрөспүүбүлүкэҕэ биллэр бизнесменнэр «Кыраныыссата суох фабрика» диэн тэрээһиҥҥэ кыттыыны ыллылар.
«1window» консалтинговай хампаанньа дириэктэрэ Никифор Меккюсяров,
Саха сиригэр оҕуруот аһын эрэ буолбакка, арбуһу кытта үүннэр фермер Артур Эм,
психологическай киин салайааччыта, дьиэ кэргэн психолога Надежда Васильева
оҕолору уонна кинилэр төрөппүттэрин хамаандаларга арааран, бэйэ дьыалатын тэринэн, дьоҕус бизнес эйгэтигэр хайдах бэйэни холонон көрүөххэ сөбүгэр үөрэттилэр.
Ол курдук, 10-12 саастаах оҕолор минньигэс ас маҕаһыынын аһан үлэлэттилэр, парикмахерскай салонун да астылар, ким эрэ чупа-чупс, ким эрэ олохтоох отонтон вафлялаах пирожнай оҥорор сыахтары аста. Иккис хамаандаҕа 13-15 саастаах обургу оҕолор кыттыбыт буолан, бырайыактара да олохтоохтук толкуйдаммыт. Кинилэр футболка арааһын тигэр фабриканы аһан үлэлэтэр бырайыагы толкуйдаабыттар. Ол онтуларын ымпыгар-чымпыгар диэри толкуйдаан баран, бэрт күүстээхтик көмүскээтилэр.
35 №-дээх оскуола үөрэнээччитэ Айсен Неустроев доруобуйатынан хааччахтаах буолан, дьиэтигэр олорон үөрэнэр. Кини өрөспүүбүлүкэтээҕи инбэлиит оҕолор доруобуйаларын тупсарар кииннэригэр ыытыллар бары тэрээһиннэргэ актыыбынайдык кыттар. Айсен доҕотторун кытта Саха сиригэр биллэр бизнесменнэри кытта көрсүһүүгэ анаан кэлэн кыттыыны ылла.
Кини хамаандатын салайааччытынан биллиилээх оҕуруотчут Артур Эм буолла. 15 саастаах Айсен тыйаатыры наһаа сөбүлүүр. Ол иһин киин иһинэн үлэлиир тыйаатыр куруһуогун актыыбынай кыттыылааҕа. Айсен Неустроев маны таһынан үҥкүүлүрүн наһаа сөбүлүүр. Уолчаан оскуола кэнниттэн айар үлэҕэ бэйэ дьыалатын тэринэн баҕарар.
Тэрээһиҥҥэ актыыбынайдык кыттыбыт оҕолорго «Урбаан фабриката — оҕолорго» үөрэхтээһин бырайыагар салгыы кытталларыгар анаан сэртэпикээт туттардылар. Кинилэр ортолоругар Айсен Неустроев эмиэ баар.
Оҕолорун кытта дьыалабыай оонньууга кыттан баран, дьиэҕэ олорор оҕолорун кытта туох дьыаланан дьарыктаныахтарын сөбүн туһунан төрөппүттэр уопуттаах бизнесменнэр сэминээрдэригэр сылдьан, кинилэр сүбэлэрин иһиттилэр.
Маныаха «Мин биисинэһим» киинтэн кэлэн эмиэ олус туһалаах сүбэни-аманы биэрдилэр.
Елена ПОТОЦКАЯ, «Саха сирэ» хаһыат, edersaas.ru
Хаатыскаҕа ааптар түһэриитэ.