СӨ Экологияҕа министиэристибэтэ ойуур баһаардара турбут сүрүн төрүөттэрин ардаҕа суох кураанах этиҥтэн, чаҕылҕантан диэн быһаарар.
ЫБММ сулууспата уот нэһилиэнньэлээх пууҥҥа суоһаан, дьоҥҥо кутталы үөскэттэҕинэ көмөҕө тахсар. Ол курдук, Арассыыйа ЫБММ Хабаровскайдааҕы авиационнай быыһыыр кииниттэн өрөспүүбүлүкэҕэ Бе-200 сөмөлүөт көмөҕө кэллэ. Ойуур баһаара туран, ыарахан балаһыанньаны үөскэппит оройуоннарга үлэлиэҕэ. Бастатан туран, Хаҥалас улууһугар Сиинэҕэ уот чугаһыыр кутталын тохтоторго, ону сэрэтэргэ таҕыста. Сөмөлүөт 15 төгүл 110 туонна ууну кутта. Мантан сиэттэрэн, нэһилиэнньэ мотуордаах оҥочонон Балтыһах уонна Батамай арыытыгар тахсартан туттунарыгар сүбэлииллэр.
Дьааҥы уонна Эдьигээн улуустарыгар Арассыыйа ЫБММ авиацията эмиэ үлэлиир. Ми-8 бөртөлүөттэр 573 туонна ууну куттулар, ойуур баһаарын умуруорарга 309 киһини уонна 24 450 киилэ таһаҕаһы тиэрдэргэ көмөлөстүлэр.
Дьааҥыга 16 ойуур баһаара турда, уот 215 378,0 га сири ылла. Балаһыанньаны хонтуруолга тутарга улууска СӨ Бырабыыталыстыбатын биэдэмистибэ икки ардынааҕы оробуочай бөлөҕө үлэлиир.
Марианна Тыртыкова, «Саха сирэ» хаһыат, edersaas.ru