«Якутскэнерго» ПАУо генеральнай дириэктэрэ Олег Тарасов үлэтиттэн уурайарын туһунан сурах бүгүн сарсыардаттан социальнай ситимнэргэ тарҕанна. Сайабылыанньатын номнуо «Илиҥҥи энергетическэй ситимнэр РАУо» дириэктэрдэрин сэбиэтигэр киллэрбит үһү.
Анивера Акимова, «Саха сирэ» хаһыат, https://edersaas.ru/
Сурах төһө оруннааҕын чуолкайдаһаары, хампаанньа пресс-сулууспатын исписэлиистэрин кытары кэпсэтэ сылдьыбыппар: «Бакаа туох да диэн этэр кыахпыт суох. Официальнай иһитиннэрии биһиэхэ кэлэ илик», – диэтилэр. Ол эрээри, тыала суохха мас хамсаабат. Сурах хоту иһиттэххэ, Тарасов киин сиргэ таласпыта ырааппыт.
Аны хампаанньа бас билэр тэрилтэтэ – «Сахаэнерго» АУо хоту улуустарга кыһыҥҥы суолунан уматыгы кэмигэр тириэрдибэккэ, билигин балаһыанньа кытаатан турар. Иккиһинэн, энергетическэй эбийиэктэргэ саахал тахсыыта элбээн, хампаанньа үлэтин атахтыыр.
Олег Тарасов 2015 сыллааҕы дохуота 42 мөл. 751 тыһ. солкуобайга тэҥнэспитэ. Ыйдааҕы дохуота ортотунан 3 мөл. 562 тыһ. солкуобай.
Олег Тарасов «Якутскэнергоны» 2009 сылтан салайар, Нерюнгритааҕы ГРЭС-тэн ананан кэлбитэ. Ил Түмэн дьокутаата.
Энергетическэй хампаанньа үлэһиттэрэ этэллэринэн, Олег Тарасовы «РусГидро» хампаанньаҕа үлэҕэ ылыахтаахтар үһү.
Анивера Акимова, «Саха сирэ» хаһыат, https://edersaas.ru/