Дьэ, уораллара да араас, уоруйахтар да арааһынайдар. Бэл диэтэр, уорбут сиригэр пааспарын кытары хаалларааччы баар.
Абый улууһугар биир дьахтар кыыһа олорор дьиэтин көрө-бэрэбиэркэлии кэлбит. Арай көрбүтэ — дьиэ биир түннүгэ алдьаммыт. Иһирдьэ киирбитэ — кыыһын саҥа кроссовкатын сойботон барбыттар.
Бу уорууну оперативниктар «сылааһына» арыйбыттар — 19 саастаах уол итирик сылдьан, түннүгү алдьатан киирэн, атах таҥаһын уорбут уонна атыылаан харчы оҥостуохтаах эбит да, тутуллан хаалбыт. Буруйун билиммит.
Дьокуускай куоракка уоруйах Сэбиэскэй Аармыйа 50 сыла уулуссаҕа турар биир дьиэ иккис этээһин форточкатынан киирэн, икки планшеты ылан тахсыбыт. Быһылаан сиригэр тиийбит суһал-силиэстийэлиир бөлөҕү соһуччу «бэлэх» күүппүт — дьиэ палисаднигар уорууга уорбаланааччы пааспара сытарын булбуттар.
Уорбаланааччыны сарсыныгар туппуттар — Бурятияттан төрүттээх, урут хаста да сууттана сылдьыбыт, от ыйын 10 күнүгэр эрэ хаайыыттан босхоломмут урдус эбит. Бэйэтэ билиммитинэн, ити дьиэҕэ билэр киһитигэр быстах кэмҥэ олорбут. Уорар кыдьыга батарбакка, биир күн подъезд түннүгүнэн кыбартыыра форточкатыгар тиийэн, ол арааматын алдьатан, иһирдьэ киирбит. Уоран баран, соннук тахсыбыт уонна аара сиргэ пааспарын түһэрэн кэбиспит.
Эмиэ киин куоракка ааспыт ыйга Курнатовскай уулуссатыгар баар «Шашлычная» кафеттан түүн витринатын алдьатан киирэн, каассаттан 10 тыһ. солк. уорбуттар. Бу уорууга уорбаланан, урут сууттана сылдьыбыт 16 саастаах уол тутуллубут.
Оттон Аммосов уулуссатыгар турар маҕаһыынтан «Айфон» суотабай төлөпүөнү уорбуттар. Атыылааччы кэпсээбитинэн, кини төлөпүөнүн каасса аттыгар ууран баран, үлэтигэр аралдьыйбыт кэмигэр, уоран барбыттар.
Оперативниктар уорбаланааччыны туппуттар — 39 саастаах киһи бэйэтэ билиммитинэн, итирэн баран, арыгы иһэригэр харчыта бүппүт. Ыарахан сыаналаах «айфону» ааһан испит дьоҥҥо 500 солк. эрэ батарбыт.
Бу киһийдэх ырыынактан биир үлэһиттэн суотабай төлөпүөнү уорууга эмиэ уорбаланар.
СӨ ИДьМ-тын пресс-сулууспата иһитиннэрбитинэн, бу чахчыларынан РФ Холуобунай кодексатын 158-с ыстатыйатынан, ол эбэтэр, уоруу бэлиэтэ баарынан, холуобунай дьыалалар тэриллибиттэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.