Уоруу ханна баҕарар тахсар, уоруйахтарга ханна баҕарар түбэһиэххэ сөп эбит. Күүппэтэх өттүттэн. Ону полиция оперативниктара арыйбыт уорууларыттан көрүөҕүҥ.
Жатай ферматыгар
Дьокуускай куорат полициятын Жатайдааҕы отделениетыгар фермерскэй хаһаайыстыба салайааччытыттан сайабылыанньа киирбит. Уопсайа 420 тыһ. солк. сыаналаах агротехниканы уорбуттарын туһунан. Ол уоттаабыт гараастарыгар агротехниканы таһынан мотуордаах тыыта бааллара үһү.
Биэрсийэлэртэн биирдэстэринэн ити хаһаайыстыбаҕа үлэлээбит, Казахстантан төрүттээх 21 саастаах киһи ити уорууга сыһыаннаах буолуон сөбө буолбут. Тоҕо диэтэр, быһылаан тахсаатын, бу эдэр киһи сүтэн хаалбыт.
Суһал-ирдиир тэрээһиннэр кэмигэр ити биэрсийэ бигэргэммит, уорууга уорбалаан кинини туппуттар.
Барыллаан быһаарыынан, бу эдэр киһи кыһынын фермерскэй хаһаайыстыбаҕа баайы-малы харабыллаан-кэтээн олорбут. Хайа эрэ түгэҥҥэ итиччэ сыаналаах баайы уоруон баҕаран, ол санаатын толорон, тэриллэри сойботон баран, суолун-ииһин кистээри, гарааһы уоттаан кэбиспит. Уонна Хаҥалас улууһун биир ыраах сытар нэһилиэгэр куоппут. Онно тиийэн, хотоҥҥо үлэлии сылдьыбытын, оперативниктар булан туппуттар.
Ас маҕаһыыныгар
Дьокуускай куоракка биир бородуукта маҕаһыыныгар 35 саастаах дьахтар харчылаах уонна баан каарталардаах кумааһынньыгын уордарбыт. Бу уорууга уорбалаан, ханна да үлэлээбэт 34 саастаах киһини туппуттар.
Сабаҕалааһын быһыытынан, киэһэ маҕаһыыҥҥа бу киһи дьахтар суумкатын хатаабакка, аһаҕастык илдьэ сылдьарын өйдөөн көрбүт. Уонна дьахтар прилавок таһыгар табаар көрө-тала турдаҕына, аргыыйдык кэнниттэн тиийэн, көһүлүөгүн ороон ылан, сиэбигэр уктубут.
Маҕаһыынтан тахсаат, кумааһынньыктан 15 тыһ. солк. харчыны ылбыт, оттон кумааһынньыгын быраҕан кэбиспит. Харчыны түүҥҥү саататар-аралдьытар сиргэ бараабыт.
Кыбартыыраҕа
Ленскэйгэ биир дьахтар дьиэтиттэн кини суоҕар икки тэлэбиисэрин, планшетын уонна ювелирнай киэргэллэрин уорбуттар. Уопсайа 70 тыһ. солк. сыаналаах хоромньу тахсыбыт.
Уорууга уорбаланан, урут сууттана сылдьыбыт 32 саастаах киһи тутуллубут. Онно биллибитинэн, бу киһи дьахтары кытта биир хампаанньаҕа сынньанар кэмнэригэр киниттэн кыбартыыратын күлүүһүн уорбут. Онон дьиэҕэ туох да мэһэйэ, эрэйэ суох, күлүүһүнэн арыйан киирэн, ол сыаналаах маллары уоран тахсыбыт.
Оскуолаҕа
Киин куорат биир оскуолатын таҥас ыйыыр сириттэн үөрэнээччи кууркатын сиэбиттэн суотабай төлөпүөнүн уорбуттар. Төлөпүөн 20 тыһ. солк. сыаналаах эбит. Уоруу тахсыбытын туһунан оҕо ийэтэ полицияҕа биллэрбит.
Бу уорууга уорбаланааччыны туппуттар — Дьокуускай куорат 48 саастаах олохтооҕо эбит. Ол күн бу киһи оскуолаҕа киирэн, гардеробщица ханна эрэ барбыт кэмигэр түбэһэн, төлөпүөнү уоран тахсыбыт. Уонна онтун 1 тыһ. солк. сыанаҕа атыылаабыт.
Түүҥҥү кулуупка
Дьокуускай полициятын дьуһуурунай чааһыгар 35 саастаах киһи эрийэн, смартфонун уорбуттарын туһунан иһитиннэрбит. Оперативниктар уорбаланааччыны түргэнник туппуттар — эмсэҕэлээччи 20 саастаах билэр киһитэ эбит.
Ол күн бу дьон иккиэн түүҥҥү кулуупка сынньаммыттар, испиттэр-аһаабыттар. Онтон биирэ итирэн утуйан хаалбытыгар, иккиһэ атаһын смартфонун ылан, таксистка 5 тыһ. солк. атыылаабыт. Уонна ол харчытынан арыгы ылан испит.
Тэриллэри уларсар сиргэ
Дьокуускай куорат полициятын 4 №-дээх отделыгар электроинструменнары харчыга дьоҥҥо уларсарынан дьарыктанар киһи эрийбит. Уонна биир киһи киниттэн шуруповерт уларсан баран сүппүтүн, төлөпүөнэ эппиэттээбэтин туһунан эппит.
Уорбаланааччыны туппуттар — Үөһээ Бүлүүттэн төрүттээх 20 саастаах уол эбит. Уорбаланааччы билиммитинэн, кини куоракка быстах кэлэ сылдьан, ол шуруповерту ылан, дойдутугар илдьэ барбыт.
Бу чахчыларынан «Уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрэр.
Биһиги корр., «Саха сирэ» хаһыат, edersaas.ru
Хаартыска: интэриниэттэн.