Уоруон баҕарар киһи туохтан да иҥнибэт эбит
Бэрээдэк - Олох-дьаһах

Уоруон баҕарар киһи туохтан да иҥнибэт эбит

Бу күннэргэ полиция оперативниктара ханнык уоруулары арыйбыттарын СӨ ИДьМ-тын пресс-сулууспата иһитиннэрэр — өлбүт киһи малларын уорууттан саҕалаан, кыһыл көмүс биһилэххэ, саҕынньахха, бэлэсипиэттэргэ тиийэ. 

edersaas.ru

Өлбүт киһи малларын

Ленскэй полициятын дьуһуурунай чааһыгар 63 саастаах огдообо кэлэн, гарааһыттан инструменнары уорбуттарын туһунан сайабылыанньа суруйбут. Ол инструменнар өлбүт кэргэнин киэннэрэ эбит.

Уорбуттар — тепловой пушканы, болгарканы, массыына саппаас чаастарын, сваркалыыр аппарааты. Уопсайа 97.000 солк. суумалаах хоромньу тахсыбыт.

Уорбаланааччылар — урут сууттамматах 17 саастаах оскуола үөрэнээччитэ уонна 22 саастаах электромонтер — уорбуттарын атыылыы-батара иликтэринэ тутуллубуттар. Онон, маллары хаһаайкатыгар төннөрбүттэр.

Кыһыл көмүс биһилэҕи

Мииринэй полициятын дьуһуурунай чааһыгар биир дьахтар эрийэн, 4 тыһ. солк. сыаналаах кыһыл көмүс биһилэҕин уорбуттарын туһунан эппит.

Бу уорууга уорбаланан, Самарскай уобаластан төрүттээх, урут сууттана сылдьыбыт 27 саастаах киһи тутуллубут.

Уоруу маннык тахсыбыт: ити иннинээҕи күн дьахтар уорбаланааччылыын бииргэ арыгылаабыттар, онтон дьахтар утуйбутун кэнниттэн, бу киһи дьахтар тарбаҕыттан кыһыл көмүс биһилэҕин устан ылбыт уонна атахха биллэрбит.

Бэлэсипиэттэри

Дьокуускай куоракка тимир көлө бу көрүҥүн уоруу номнуо үс чахчыта бэлиэтэннэ: 19 саастаах уол дьиэтин подъеһыгар турбут 120 тыһ. солк. сыаналаах «BMX»бэлэсипиэтин, 39 саастаах дьахтартан түүн подъеһыттан 17 тыһ. солк. сыаналаах  «Старк» бэлэсипиэтин хатыыр торуоһун алдьатан туран уонна биир дьахтартан тэлгэһэтигэр турбут эмиэ «Старк» бэлэсипиэтин уорбуттар.

Үһүс уорууга уорбаланааччы тутуллубут — Дьокуускай куорат 31 саастаах, урут сууттана сылдьыбыт олохтооҕо.

Полиция бэлиэтииринэн, тимир хатыыр торуоһу (сомуогу) чыскынан таах алдьаталлар. Онон, күндү малгытын уоруйахтартан харыстыыр атын ньымалары тобулуҥ.

Нуорка саҕынньаҕы уо.д.а

Дьокуускай куоракка эмиэ биир дьахтар үчүгэйдик билбэт дьонун кытта арыгылаабытын түмүгэр, уоруу сиэртибэтинэн буолбут — 120 тыһ. солк. суумалаах хоромньуламмыт.

Дьиэтигэр ол арыгылаан баран утуйбутун кэнниттэн, ыалдьыттарыттан биирдэстэрэ плазменнай тэлэбиисэрин, нуорка саҕынньаҕын уонна суотабай төлөпүөнүн ылан барбыт.

Холуобунай ирдэбил оперативниктара 36 саастаах киһини уорбалаан туппуттар. Маллары барытын чэпчэки сыанаҕа батарбыт харчытынан бэйэтигэр ону-маны атыыласпыт.

Мрамортан билиитэлэри

Киин куорат полициятын 3 №-дээх отделын дьуһуурунай чааһыгар ритуальнай өҥөлөрү оҥорор маҕаһыын хаһаайына эрийэн, ревизия кэмигэр түөрт мраморнай мемориальнай билиитэ сүппүтэ биллибитин туһунан иһитиннэрбит. 40 тыһ. солк. тахса сыаналаах.

Оперативниктар аҕыйах күн иһигэр уорбаланааччыны туппуттар — бу маҕаһыыҥҥа оробуочайынан үлэлээбит 39 саастаах киһини. Уорбут билиитэлэрин массыынатыгар тиэйэн, бастаан бүччүм сиргэ кистээбит, онтон биирдиитин 5-тии тыһ. солк. атыылаабыт.

Бу чахчыларынан «Уоруу» ыстатыйанан холуобунай дьыалалар тэриллибиттэр.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

одиннадцать + 12 =