Уоруу сиэртибэтинэн ким баҕарар буолуон сөп — кырдьаҕас эмээхсинтэн саҕалаан, баай-талым олохтоох киһиэхэ тиийэ. Сууматыттан тутулуга суох, кыра да, улахан да, биир да, элбэх да малгын-салгын уордардаххына, санааҕар сүрдээх куһаҕан буолааччы — бэйэҕин атаҕастаппыт курдук сананааччыгын. Бэйэлээх бэйэҥ хара көлөһүҥҥүнэн атыыласпыт малгын ким эрэ харса-хабыра суох кэлэн ылан барара — санааны олус саппаҕырдар, киһини хомотор.
Вера МАКАРОВА, «Саха сирэ» хаһыат, edersaas.ru
Ол эрээри, Нерюнгрига биир дьахтар 8.500 солк. сыаналаах суотабай төлөпүөнүн уордарыыга бэйэтэ буруйдаах. Кини аралдьытар-саататар түүҥҥү кулуупка сынньана сылдьан, төлөпүөнүн барнай стойкаҕа ууран, үҥкүүлүү барбыт. Сотору буолан баран кэлбитэ — төлөпүөнэ мэлигир. Тута полицияҕа эрийбит.
Оперативниктар уорбаланааччыны түргэнник булбуттар — бу кулуупка үлэлиир 24 саастаах кыыс эбит. Кыыс буруйун билиммит — таах сытар төлөпүөнү ылан, хаҕын уонна сим-каартатын устан быраҕаттаабыт уонна бэйэтигэр иҥэриммит.
Дьокуускай куоракка 70-лаах эмээхсин полицияҕа эрийэн, кыбартыыратыттан холодильнигын уонна таҥас сууйар массыынатын уорбуттарын эппит. Уопсайа 50 тыһ. солк. сыаналаах хоромньу тахсыбыт.
Бу уорууга бастаан кини дьиэтин куортамнаабыт дьахтар уорбаламмыт. Ол эрээри, сыыйа биллибитинэн, дьахтар буолбакка, кини бииргэ төрөөбүт быраата — Томпо улууһуттан төрүттээх, урут суол быраабылатын кэһэн сууттана сылдьыбыт 25 саастаах уол — тутуллубут.
Уоруу маннык тахсыбыт: куортамнаабыт дьахтар дьиэттэн болдьоҕун иннинэ тахсан, быраатын икки күҥҥэ онно хаалларбыт. Бу эдэр киһи онон туһанан, бытовой тиэхиньикэни атыылаан, 8 тыһ. солк. харчыны бэйэтигэр ылан, туттан баран, атахха биллэрбит.
Эмиэ киин куоракка сибэкки атыылыыр маҕаһыынтан эркиҥҥэ ыйанар 6 тыһ. солк. сыаналаах плазменнай тэлэбиисэри уорбуттар. Ол туһунан маҕаһыын хаһаайката полицияҕа тыллаабыт. Оперативниктар Сайсары оройуонугар баар маҕаһыыҥҥа ойутан тиийбиттэр.
Бу уорууга Дьокуускайтан төрүттээх 19 саастаах уол уорбаланан тутуллубут.
Уорбаланааччы билиммитинэн, кини түүн маҕаһыын форточкатын тааһынан алдьатан киирэн, тэлэбиисэри ылан тахсыбыт. Уонна тэлэбиисэри табаарыһын дьиэтигэр уурдарбытын оперативниктар булбуттар.
Өссө биир улахан хоромньулаах уоруу эмиэ Дьокуускайга тахсыбыт.
Хатыҥ-Үрэххэ чааһынай дьиэттэн 800 тыһ. солк. тахса суумалаах бытовой уонна цифровой тиэхиньикэни уорбуттар.
Киин куорат полициятын оперативниктара уорбаланааччыны сарсыныгар туппуттар — Дьокуускайтан төрүттээх, урут хаста да сууттана сылдьыбыт 29 саастаах киһи.
Уорбаланааччы билиммитинэн, хаһаайыттар дьиэлэриттэн тахсан барааттарын кытта, күлүүһү алдьатан киирэн, ити сыаналаах маллары сүгэн-көтөҕөн, ылан тахсыбыт. Уоруллубуттан сороҕун батара охсубут, сороҕун куортамнаан олорор дьиэтиттэн булбуттар.
Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн ылылынна.