Уоруйахтар тутулуннулар: иккитэ — дьахтар

Ааптар: 
Бөлөххө киир:

Дьокуускай куорат полициятын холуобунай ирдэбилин оперативниктара уорууга уорбаланааччылары туттулар.

edersaas.ru


Бастакы түбэлтэ. 43 саастаах дьахтар атыы-эргиэн киинигэр сувенир маҕаһыыныгар бэрт өр тала сатыы туран, суумкатын уордарбытын өйдөөн көрбөккө да хаалбыт. Суумкатыгар буоллар, үгүспүтүгэр курдук, докумуоннара, суотабай төлөпүөнэ уонна харчыта (800 солк.) бааллар эбит.

Бу уорууга уорбаланан, Нам улууһуттан төрүттээх, урут сууттана сылдьыбыт 51 саастаах дьахтар тутуллубут. Уорбаланааччы билиммитинэн, дьахтар сувенирдары үлүһүйэн көрө-тала турдаҕына, прилавокка уурбут суумкатын аргыый сойботоот, тахсар ааны былдьаспыт.

Иккис түбэлтэ. Биир киһи тутулла турар дьиэтин уһаайбатыттан тутуу матырыйаалларын уорбуттар. Уорбаланааччыны туппуттар — урут наркотикка сыһыаннаах буруйу оҥорон сууттана сылдьыбыт 30 саастаах киһи эбит. Уоруйах, хаһаайыттар суох кэмнэригэр киирэн ылан тахсыбыт.

Үһүс түбэлтэ. Бу сырыыга уулуссаҕа билсиһии сиэртибэтинэн эдэр киһи буолбут. Бу киһи ол уулуссаҕа билсибит кыыһын дьиэтигэр ыҥырбыт, билсиһиини бэлиэтии диэн тиэмэҕэ. Арыгынан бэлиэтээн баран, дьиэлээх хаһаайын утуйбутун кэнниттэн, бу 23 саастаах, киин куорат олохтооҕо кыыс уол баанын каартатын сойбоппут уонна банкомакка тиийэн, 22.300 солк. харчытын устубут.

Бу чахчыларынан «Уоруу» ыстатыйанан холуобунай дьыалалар тэриллибиттэрин туһунан СӨ ИДьМ-тын пресс-сулууспата иһитиннэрэр.

Биһиги корр., «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0