Олунньу 28 күнүгэр Саха сирин идэлээх сойуустарын дьиэтин саалатыгар СӨ Уопсастыбаннай палаататын көҕүлээһининэн, СӨ идэлээх сойуустарын Президиумун уонна СӨ ОНФ ыстаабын холбоһук мунньахтара буолла.
edersaas.ru
СӨ Уопсастыбаннай палаататын Сэбиэтэ, муус устарга буолар Арассыыйа Төрүт Сокуонун уларытыыга куоластааһыны өйүүр Уопсастыбаннай Сэбиэт тэрийэргэ диэн этии киллэрбитин, СӨ идэлээх сойуустара уонна СӨ Уопсастыбаннай норуодунай фронт (ОНФ) өйөөтүлэр. Мунньахха СӨ Ил Түмэнин бэрэссэдээтэлэ Петр Гоголев, дьокутаат Алексей Еремеев, СӨ Ыччат дьыалаларыгар уонна социальнай коммуникацияларга миниистир Степан Саргыдаев кытыннылар. Петр Гоголев Төрүт Сокуоҥҥа уларыйыы киирэригэр уопсастыбаннас өттүттэн интэриэс, өйөбүл баарын бэлиэтээтэ. Быыбары өйүүр Уопсастыбаннай Сэбиэт тэриллибитинэн Ил Түмэн аатыттан махтанна. Саха сиринээҕи Киин быыбардыыр хамыыһыйа бэрэссэдээтэлэ Алексей Ефимов быыбарга бары усулуобуйа тэриллиэҕин уонна быыбар кэмигэр Уопсастыбаннай Сэбиэт үлэтигэр мэһэйэ суох үлэни эрэннэрдэ. Кини Уопсастыбаннай кэтээн көрөөччүлэри кытта үлэҕэ үөрүйэх баарын бэлиэтээн туран, РФ Киин быыбардыыр хамыыһыйатын бэрэссэдээтэлэ Элла Памфилова кэтээн көрөөччүлэр үлэлэрин бэрээдэгин туһунан бу күннэргэ ыйаах тахсыахтааҕын биллэрбитин туһунан эттэ.
Ньургуйаана Иванова, «Саха сирэ» хаһыат, edersaas.ru