Академик Афанасий Чугунов аатынан Мэлдьэхси орто оскуолатыгар сааскы куйуурдааһын ыытылынна. Куйуурдааһыҥҥа 5, 6, 7, 8 уонна 10 кылаас уолаттара, учууталлар кытыннылар. Үгэс курдук сыл аайы ыытыллар тэрээһин быйыл үлэ уруогун учуутала Анатолий Охлопков “Уол оҕону үлэнэн иитии” бырайыак чэрчитинэн буолла.
edersaas.ru
Тыһаҕастаах алаас күөлүгэр тахсан, аал уоту аһатан, Баай Байанайтан көрдөһөн, оҕолорго булчут сиэрин билиһиннэрдилэр. Салгыы куйуурдааһын саха төрүт дьарыгын көрөн, сатабылга уһуйуллан, 3 хамаандаҕа арахсан, куйуурдаатылар. Айылҕаҕа тахсан дуоһуйа сынньанан, күннэрин туһалаахтык атаардылар. Анаабыт курдук, бу күн халлаан сылыйан, туран биэрдэ. Уолаттар хамаандаҕа арахсан, бэйэ бэйэлэригэр көмөлөсүһэн куйуурдаатылар, барыта 425 собону куйуурга хабан, үөрүүлэрэ үрдээтэ.
Түргэнник ойбону алларыыга — 5 ойбону тэһэн, 10 кылаас үөрэнээччитэ Дима Колесов тэҥнээҕин булбата. Саамай элбэх балыгы куйуурга хаптаран, 157 соболоох Дима Колесов хамаандата бастаата. Саамай улахан балыгы ылан Максим Андросов хамаандата инники таҕыста. Бастыҥ хамандыыр аатын 8 кылаас үөрэнээччитэ Гарик Павлов ылла. Оҕолорго анал ааттары сэргэ, учууталлар Юлия Петрова, Алевтина Кривогорницына, Лена Сивцева, Анна Герасимова, Анатолий Охлопков бириистэрин туттардылар.
Оҕолор бу күнү көдьүүстээхтик атааран, дьонноругар илии тутуурдаах, өттүк харалаах тарҕастылар.
Ньургуйаана СКРЯБИНА-САЙДЫЫНА, “Саха сирэ”, edersaas.ru сайтка анаан.