Уус Алданнааҕы сокуоннай саастарын ситэ илик оҕолорго аналлаах социальнай-реабилитационнай кииҥҥэ «Аҕатын туйаҕын хатарар уол оҕо» девизтээх «Уол—аҕатынан!» диэн улуустааҕы күрэхтэһии ыытыллыбыт. Бу туһунан киин дириэктэрэ Сталина Данилова кэпсээтэ.
—Долгутуулаах тэрээһин иккис сылын тэриллэн ыытылынна. Ыраахтан-чугастан түмсүбүт ыалдьыттары киин итиллээччилэрэ уонна «Тойон Мүрү» култуура киинин үлэһиттэрэ ырыанан-тойугунан эҕэрдэлээтилэр. Ол кэннэ күрэхтэһээччилэргэ истиҥ тыллар этилиннилэр. Быйылгы күөн күрэскэ Бэрт Ууһун нэһилиэгиттэн Олесовтар, Колодезниковтар, Өнөртөн Сергеевтар, Мындаабаттан Неустроевтар, Бороҕонтон Копыриннар, Турантаевтар ох курдук оҥостон, бэлэмнэнэн кэлэн кытыннылар.
Түөрт түһүмэххэ илин-кэлин түмүһүү кытаанаҕа буолла. Уолаттар аҕаларын кытары мас эрбээтилэр, хайыттылар. Салгыы сыал ытыыга, бэлисипиэтинэн күчүмэҕэйдэрдээх сири тэбэн туорааһыҥҥа уонна суол быраабылатын төһө билэллэригэр, тутуһалларыгар күрэстэстилэр. Онтон судьуйалар түмүк таһаарар кэмнэригэр, түһүлгэҕэ мустубут ыалдьыттар, күрэхтэһээччилэр сааскы сылаас салгыҥҥа сэһэргэһэ-сэһэргэһэ ис миинин истилэр, бэртээхэй шашлык сиэтилэр.
Долгутуулаах түгэнинэн түмүгү таһаарыы буолла. Ол курдук, тыҥааһыннаах күрэхтэһии түмүгүнэн Сергеевтар кыайыылаах үрдүк аатын ыллылар, иккискэ — Олесовтар, үһүскэ — Турантаевтар таҕыстылар. Күрэхтэһии сүрүн көҕүлээччитинэн уонна салайааччытынан тэрилтэ социальнай педагога В.П.Данилов буолла. Дохсун ытыс тыаһыгар арыаллатан улуустааҕы култуура управлениетын начаалынньыгын солбуйааччы Л.С.Павлова, дьиэ кэргэн политикатын отделын исписэлииһэ Л.Н.Бурнашева, «Арассыыйа ийэлэрэ» хамсааһын улуустааҕы филиалын салайааччы М.Ф.Федотова, улуус үөрэҕин управлениетын исписэлииһэ М.М.Петухова, Мүрү нэһилиэгин баһылыгын солбуйааччы В.В.Колесова, «Алаас хотуна» дьахтар сүбэтин бэрэссэдээтэлэ В.Н.Шадрина, «Эр хоһуун» эр дьон сүбэтин бэрэссэдээтэлэ А.Г.Аргунов сыаналаах бириистэри туттардылар. Маны сэргэ улуустааҕы социальнай управление, ыччакка уонна дьиэ кэргэҥҥэ социальнай-психологическай көмө киинэ, эппиэкэ отдела, ГАИ, нэһилиэнньэ дьарыктаах буолуутун киинэ анал бириистэри туруоран үөрүүнү-көтүүнү өссө үксэттилэр.
Дьон-сэргэ сибиэһэй салгынынан дуоһуйа тыынан, күүрээннээх, үрдүк тэрээһиннээх күрэхтэһииттэн астынан тарҕастылар. Сыллата маннык тэрээһин ыытылларыгар баҕардылар.
Сардаана БАСНАЕВА, «Саха сирэ» хаһыат, edersaas.ru