М.К.Аммосов аатынан Хотугулуу-Илиҥҥи федеральнай университекка (ХИФУ) Медицинскэй институт биир тарбахха баттанар үөрэх кыһатынан биллэр. Быйылгыттан бу институт иһинэн орто анал идэлээх үлэһиттэри бэлэмниир мэдиссиинэ кэллиэһэ аһылынна.
Институт салалтата мэдиссиинэ кэллиэһин аһар туһунан университет ректоратыгар өссө уруккуттан туруорсар биир сүрүн хайысхата буолар. Мэдиссиинэ орто анал үөрэҕин арыйарга көҥүл биэрэр судаарыстыбаннай аккредитацияны былырыын ааспыттар. Инньэ гынан быйыл “медицинскэй сиэстэрэ дьыалата” диэн идэҕэ төлөбүрдээх 25 миэстэ көрүллүбүт. Инникитин кэллиэс иһинэн мэдиссиинэ атын идэлэрэ эбиллиэхтэрэ диэн сабаҕалыыллар.
ХИФУ Мэдиссиинэҕэ институтун, сиэстэрэ дьыалата кафедратын старшай преподавателэ Лия Попова:
— Мэдиссиинэ институтугар анал үрдүк үөрэхтээх сиэстэрэлэри бэлэмнээбиппит быданнаата. Бу үөрэх салаатын бүтэрбит выпускниктарбыт үгүстэрэ доруобуйа хайысхатын эйгэтигэр араас салайааччы буолан ситиһиилээхтик үлэлии сылдьаллар.
Ханна баҕарар утумнаах үөрэхтээһин чиҥ билиини иҥэрэр. Ол иһин Мэдиссиинэ институгар киириэхтээх оҕолору үгүстэрин оскуолаҕа үөрэнэр саастарыттан Аччыгый медицинскэй академияҕа үөрэтэн таһаарабыт. Академияҕа 9-11 кылаас үөрэнээччилэрин хабабыт. Оҕолор куруһуок курдук дьарыктаналлар, үөрэнэллэр. Доруобуйа харыстабылын эйгэтэ чахчы мин эйгэм, олохпун инникитин бу үлэни кытта ситимниэхпин баҕарабын диэн быһаарыннахтарына, оҕолор салгыы бу саҥа аһаллыбыт мэдиссиинэ кэллиэһигэр эбэтэр Мэдиссиинэ институтун атын исписээлинэстэригэр туттарсыахтарын сөп. Онон саҥа аһыллар орто анал мэдиссиинэ кэллиэһэ утумнаах үөрэхтээһин биир сүһүөҕэ буолар.
Иккиһинэн, билиҥҥи үрдүк үөрэх ирдэбилигэр ордук анал үөрэхтээх учуутал тиийбэтинэн сибээстээн, ордук тыа сирин итиэннэ хоту оройуоннар оҕолорун билиилэрэ кыайан толору эппиэттээбэтэ кистэл буолбатах. Онон биһиги баҕа санаабыт диэн үрдүк үөрэхтээх сиэстэрэ, быраас ыарахан үлэтигэр баҕалаах, дьулуурдаах оҕо бу саҥа аһыллыбыт мэдиссиинэ кэллиэһигэр киирэн онно ситиһиилээхтик үөрэнэн, кэлин салгыы үөрэҕин быспакка, баҕар, быраас үөрэҕэр салгыы үөрэниэн эмиэ сөп.
Үсүһүнэн, ханнык баҕарар орто анал үөрэхтэргэ курдук, быйыл аһыллар мэдиссиинэ кэллиэһигэр 11-с кылаас кэнниттэн аттестат орто баалынан үөрэххэ ылыллар, — диэн кэпсиир.
Онон ХИФУ-ка саҥа аһыллыбыт мэдиссиинэ кэллиэһэ Саха сирин дьонун-сэргэтин доруобуйатын харыстыыр эйгэҕэ биир тутаах үөрэх салаата буолара чахчы. Итиэннэ үрдүк үөрэхтээх сиэстэрэ эбэтэр быраас идэтин баһылыан баҕалаах оҕолорго эбии кыах биэрэрэ саарбаҕа суох эбит.
Санатан эттэххэ, М.К.Аммосов аатынан Хотугулуу-Илиҥҥи федеральнай университекка мэдиссиинэ кэллиэһин сэргэ юридическай, инфраструктурнай технология кэллиэстэрэ бааллар.
Людмила ПОПОВА, “Саха сирэ” хаһыат, edersaas.ru