Тохсунньу 25 күнэ — Устудьуон күнэ. Ол сыллары киһи олоҕун сандал сааһа дииллэр. Кырдьык, олох киэҥ аартыгар үктэнии, үөрэх, доҕордоһуу, таптал… Хас биирдии киһи эдэр сааһын кэрэ кэрчигин санаатаҕына, дуоһуйар буолуохтаах. Биһиги араас идэлээх, ыччакка холобур буолар дьонтон устудьуоннуур сылларын хайдах атаарбыттарын ыйыталастыбыт.
Евгений Урааҥхай, хаартыскаҕа түһэрээччи:
— Мин 2011 сыллаахха М.К. Аммосов аатынан ХИФУ физико-техническэй институтун бүтэрбитим. Инженер-электрик идэлээхпин. Ол эрээри идэбинэн үлэлээбэппин. Бэйэм айымньылаах үлэнэн дьарыктанарбын сөбүлүүбүн. Онон хаартыскаҕа түһэрэбин. Устудьуон олоҕун киһи уопсайга үчүгэйдик билэр. Саамай өйбөр хатаммыт түгэннэр Сэргэлээххэ буолбуттара. Күн бүгүҥҥэ диэри бииргэ үөрэммит оҕолорбун кытта билсэбин, сыл аайы ыам ыйын саҕаланыыта шашлыктыы тахсабыт, сайын бииргэ балыктыыбыт.
Янда Табунанова, фитнес-тренер:
— Мин хас даҕаны үөрэх кыһатыгар үөрэммитим: Санкт-Петербурга Идэлээх сойуустар университеттарыгар, Санкт-Петербурдааҕы киинэ уонна тэлэбиидэнньэ институтугар үөрэнэн баран, ол эрээри түмүгэр Саха судаарыстыбаннай университетын бүтэрбитим. Уопсастыбаннаһы кытта сибээс исписэлииһэ идэлээхпин. Бу тухары чаҕылхай түгэн олус элбэх этэ: Пушкиноҕа ыһыах, бастакы кууруска сүрэхтэнии… Хас биирдии күнтэн үөрэр-көтөр, ырааҕы ырыҥалыыр, таптыыр этибит. Устудьуоннуур сыллар диэтэххэ, мас остуоллаах, от күөҕэ лаампалаах Фучик киэҥ бибилэтиэкэтин, кэҥэс, сырдык үөрэнэр хостору, сосискалаах тиэстэни мотуйар остолобуойбутун, Питер күһүнүн, бииргэ үөрэммит доҕотторбун саныыбын. Бииргэ үөрэммиттэрбитин кытта күн бүгүҥҥэ диэри билсэбит, көрсөбүт, дьиэ кэргэнинэн доҕордоһобут.
Максим Тихонов, «Бөҕөс» спортивнай кулууп салайааччыта:
— Мин Бүлүүтээҕи педагогическай кэллиэскэ үөрэммитим. “Сахамедиаҕа” Саха-информационнай ааҕыныстыбаҕа хаартыскаҕа түһэрээччинэн үлэлээн баран, бэйэм идэбинэн үлэлиибин. “Бөҕөс” диэн кулууп тэринэн, функциональнай многоборьеҕа дьону дьарыктыыбын. Дэриэбинэттэн кэллиэскэ бастаан киирэн баран, киэҥ, улахан, сырдык таас дьиэҕэ үөрэнэрбиттэн олус астыммытым. Саҥа дьону кытта билсии-көрсүү, доҕордоһуу онно баара. Устудьуоннуур сылларбын олус истиҥник саныыбын.
Гея Буртахова, “Саха” НКИХ ыытааччыта, суруналыыс:
— Мин идэбинэн суруналыыспын – тэлэбиидэнньэ уонна араадьыйа эрэдээктэрэбин. М.К. Аммосов аатынан ХИФУ филологическай факультетын бүтэрбитим. Буоларын курдук, устудьуон сылларбын олус күндүтүк саныыбын. Саамай умнуллубат чаҕылхай түгэннэр онно бааллара. Биэс сыл көрүөх бэтэрээ, биир күн кэриэтэ элэстэнэн ааспыта. Сессия кэмигэр олох хойукка диэри бибилэтиэкэҕэ олорорбутун, эксээмэҥҥэ түүннэри бэлэмнэнэрбитин саныыбын. Ол кэмҥэ олус долгутуулаах буолара. Сессия устудьуоннары олус түмэр. Бэйэ-бэйэбитигэр көмөлөсүһэр, өйөһөр этибит. Биһиги куурустан бары кэриэтэ идэбитинэн үлэлиибит. Суруналыыс буолбуппуттан, идэбиттэн олус астынабын. Аныгы устудьуоҥҥа билигин сайдарыгар усулуобуйа барыта баар. Киириилээх-тахсыылаах, билиэн-көрүөн эрэ баҕалаах буолуохтаах. Уопсайынан, үөрэҕи таһынан эмиэ көхтөөх буоллаҕына, өссө сайдар. Холобур, мин үөлээннээхтэрбиттэн уопсастыбаннай үлэҕэ көхтөөх устудьуоннар билигин оннуларын булан, үчүгэй үлэҕэ, сөптөөх хамнаска сылдьаллар.
— Устудьуон сылларым саамай чаҕылхай түгэнэ диэн, таптыыр кэргэммин көрсүбүтүм буолар. Дьиэҕиттэн тэйэн, улахан киһи олоҕор үктэнэр, саҥаны билэр кэмиҥ, биллэн турар, олус күндү.
Устудьуоннуур сылларгар олоххор тугунан дьарыктаныаххын баҕарар суолгун тобулуохтааххын, быһаарыныахтааххын. Ол саҕаттан билэн, үөрэтэн, чинчийэн, бастакы хардыылары оҥорор ордук диэн сүбэлиибин. Билиҥҥи устудьуоннарга оннук бэйэни сайыннарар кыах баар. Холобур, үгүстэр үлэлииллэр, дууһалара сытар эбии дьарыктаахтар. Биһиги саҕана үөрэхпитин бүтэриэхтээхпит, ол кэннэ ханна даҕаны халбарыйбакка идэбитинэн үлэлиэхтээхпит диэн өйдөбүл баара. Билигин оҕолонон-урууланан олорон санаатахпына, устудьуоннуу сылдьан эрдэттэн толкуйдаан, бириэмэни сүтэрбэккэ, сөбүлүүр дьарыкпынан дьарыктанан саҕалаабытым буоллар, дии саныыбын. Итиэннэ тэҥинэн элбэҕи ситиһэргэ устудьуоннуу сылдьан бириэмэни сөпкө аттарарга үөрэниэххэ наада.
Надежда Самсонова бэлэмнээтэ.