Саха сирин Хаҥалас уонна Мэҥэ Хаҥалас улуустарыгар холуобунай дьыалалар тэрилиннилэр. Ол курдук, социальнай ситимҥэ «Лена» федеральнай айан суолугар улахан туонналаах массыына умайа турарын туһунан тарҕаммыт дьыала дьэ, арылынна. Холуобунай ирдэбил үлэһиттэрэ суһаллык көрдөөн улахан туонналаах массыына хаһаайынын буллулар.
edersaas.ru
Массыына хаһаайына атын эрэгийиэн олохтооҕо эбит. Кини кэпсээнинэн, массыынатыгар атыыга диэн улахан баартыйа сымыыты тиэйтэрэ суоппары наймыласпыт. Суоппар массыына спутниковай навигациятын арааран кэбиспит эбит, ол иһин хаһаайын тиэхиньикэтэ ханна тиийбитин билбэккэ сылдьыбыт. Массыыната ханна тиийбитин туһунан сураҕы кини полиция үлэһиттэриттэн истибит. Сүппүт тиэхиньикэтин хоромньутун кини 10 мөлүйүөнтэн тахса суумаҕа сыаналаабыт.
Салгыы көрдөөһүн түмүгэр, 34 саастаах массыына суоппара, быһылаан кэнниттэн Нижний Новгород куоракка көппүтүн туһунан билбиттэр. Нижний Новгород куоракка суһаллык Саха сирин холуобунай ирдэбилин үлэһиттэрэ айаҥҥа туруммуттар. Суһал ирдэбилгэ сылдьыбыт киһини тутан, Дьокуускай куоракка аҕалбыттар. Уорбаланааччы буруйун билиммит. Кини улахан баартыйа сымыыты барытын өссө Саха сирин өрөспүүбүлүкэтигэр киириэн иннинэ атыылаан бүтэрбит уонна атыы харчытын барытын тус наадаларыгар туттубут. Улахан туонналаах массыынаны уорбут суолун-ииһин кистээри, массыынаны уоттаан баран, эрдэ атыылаһыллыбыт билиэттэрин илдьэ, «Лена» федеральнай айан суолун 134 км аара массыына тохтотон, олорсон барсыбыт.
Маны таһынан полиция үлэһиттэрэ быһаарбыттарынан, Саха сирин олохтооҕун эмиэ албыннаабыта биллибит. Ол курдук, бу дьыаланы оҥоруон хас да ый иннинэ, Аллараа-Бэстээх олохтооҕун кытта социальнай ситим нөҥүө суруйсан, эрэгийиэн таһыттан массыына атыылыырын туһунан дуогабардаһан эмсэҕэлээччиттэн 300 тыһыынча солкуобайы баан каартатыгар ыыттарбыт. Харчытын тутаат даҕаны, сибээстэн сүппүт. Онон Арассыыйа федерациятын холуобунай кодексатын 158 ыстатыйатын 4 чааһынан «Уоруу» уонна 159 ыстатыйа 2-с чааһынан «Түөкүннээһин» диэн ыстатыйаларынан Тверскэй уобалас 34 саастаах олохтооҕор холуобунай дьыала тэрилиннэ.
Ульяна ЗАХАРОВА, edersaas.ru