Бу күннэргэ Кытайга коронавирус дьаҥа биллэ намыраан, Ухань куоратыттан эмчиттэр дойдуларыгар төнүннүлэр.
edersaas.ru
Кулун тутар 17 күнүгэр Уханьтан быраастар бастакы биригээдэлэрэ дойдуларыгар Шэньси провинциятыгар төттөрү айаннаабыттара.
Коронавирус ыарыы турбутун истээт, олунньу 4 күнүгэр 43 эмчит Ухань куоракка кэлэн, үлэ үөһүгэр түспүтэ…
Батсаапка тарҕаммыт эмчиттэр Уханьтан арахсар видеоларын көрө олорон киһи хараҕын уутун кыаммат… Ордук быраастар бэйэлэрэ ытаһалларын көрдөххүнэ уйадыйаҕын.
Буолумуна, бу түгэҥҥэ кинилэр эпидемияны утары үлэлии сылдьан, үгүс киһини быыһаабыт 51 саастаах биир идэлээхтэрин Лю Джимини, коронавирус диагноһын аан бастаан туруорбут Ли Вэнльяны уонна да атын бэйэлэрин кэллиэгэлэрин дьон доруобуйатын иннигэр олохторун толук уурбуттарын санаан, хараастыбыттара чахчы. Хомойуох иһин, бу хорсун эмчиттэр дьону быыһыы сылдьан, бэйэлэрэ сыстыганнаах дьаҥҥа хаптарбыттара. Кинилэр дьон тыыннаах хааларын суорума суолламмыттарын туһунан интэриниэккэ суруллубута.
Уханьтан барыыларыгар сүүһүнэн дьон тахсан, быраастарга сиргэ тиийэ махтанан бокулуоннаабыттара.
Биһиги ыарахаҥҥа, уустук түбэлтэҕэ түбэстэхпитинэ эрэ аттыбытыгар эмчиттэр баалларын өйдүүбүт. Сыстыганнаах ыарыытын билэ-билэ, төһөлөөх эмчит бэйэтин харыстаммакка, билигин коронавируһу кытта охсуһа сылдьара буолуой? Оттон бэйэбит аттыбытыгар сылдьар эмчиттэрбит биһиэхэ өрүү кыһаналларын эмиэ төһө улахаҥҥа уурабытый?
Сүгүрүйэбит маҥан халааттаах аанньалларбытыгар! Эһиги баар буолан, биһиги көмүскэллээх курдук сананабыт. Кытаатан бэйэҕитин харыстаныҥ дуу…
Елена ПОТОЦКАЯ, «Саха сирэ» хаһыат, edersaas.ru
Хаартыска — видео түгэннэриттэн.