Хаҥалас улууһун Улахан Ааныгар олорор удьуор үлэһит Пахомовтар өрөспүүбүлүкэ бастыҥ үлэһит ыалларын Бочуотунай Кинигэтигэр киллэрилиннилэр.
edersaas.ru
– Пахомовтар үлэлэрин ыстааһа холбоон 218 сыл буолла. Бу удьуор үлэһит ыал колхуос, сопхуос саҕаттан ыанньыксыттарынан, мэхэньисээтэрдэринэн үлэлээннэр, нэһилиэккэ уонна улууска тыа хаһаайыстыбатын сайыннарыыга сүҥкэн кылааттарын киллэрбиттэрэ. Биһиги кинилэринэн киэн туттабыт уонна ыччаттарга холобур оҥостобут, – диэтэ дьиэ кэргэни чиэстээһиҥҥэ улуус баһылыгын солбуйааччы Олег Иринеев.
Ыал аҕата, үлэһит династия баһылыга, Иван Васильевич Пахомов тыыл уонна үлэ бэтэрээнэ, тыа хаһаайыстыбатыгар 45 сыл үлэлээбитэ, «Коммунистическай үлэ удаарынньыга» бэлиэнэн, Улуу кыайыы үбүлүөйдээх мэтээллэринэн наҕараадаламмыта, ыччакка настаабынньыктаабыта. Ыал ийэтэ Валентина Степановна Иринеева 34 сыл ыанньыксыттаабыта, нэһилиэк Бочуоттаах олохтооҕо, үлэ бэтэрээнэ, «Ийэ Албан аата III степеннээх» уордьан кавалера.
Оҕолоро: Вера Ивановна Прохорова (Пахомова) ыанньыксыттаабыта, арыы сыаҕар маастардаабыта, Николай Иванович 1975 сылтан күн бүгүн да үлэлии сылдьар, өрөспүүбүлүкэ тыатын хаһаайыстыбатын туйгуна, Степан Иванович 35 сыл ыстаастаах, тырахтарыыстаабыта, Виктория Ивановна Лебедева (Пахомова) 24 сыл ыанньыксыттаабыта, Анна Ивановна Федорова 29 сыл үлэ ыстаастаах, билигин «Бөртө» сылгы собуота» ХЭУо бухгалтер-кассира, өрөспүүбүлүкэ тыатын хаһаайыстыбатын туйгуна. Удьуор үлэһит дьиэ кэргэн «Бөртө» сылгы собуота» ХЭУо атаҕар турарыгар төһүү күүс буолбуттара. Нэһилиэк спортивнай уонна уопсастыбаннай олоҕор көхтөөхтүк кытталлар. Николайдаах Степан волейболга тэрилтэ, нэһилиэк, улуус чиэһин элбэх төгүл көмүскээбиттэрэ.
Санатан эттэххэ, Саха Өрөспүүбүлүкэтин бастыҥ үлэһит ыалларын Бочуотунай Кинигэтигэр сүүстэн итэҕэһэ суох үлэ ыстаастаах, хас да көлүөнэ удьуор үлэһиттэр киллэриллэллэр.
Раиса Сибирякова, «Саха сирэ» хаһыат, edersaas.ru