Күн бүгүн оскуола үөрэнээччилэрэ коронавируһунан сибээстээн, сынньалаҥҥа олороллор. Салгыы ыраахтан олорон (дистанционно) үөрэниэхтэрэ. Бу күннэргэ учууталлар, төрөппүттэр эрдэтинэ платформа хайдах үлэлиирин бэрэбиэркэлииллэр. Маныаха үгүс ыйытыы үөскүүр.
Төрөппүттэр, оҕолор үөрэниэхтээх Учи.ру онлайн-платформалара төлөбүрдээх дуо диэн туоһулаһаллар. СӨ Үөрэҕин уонна наукатын министиэристибэтин пресс-сулууспата иһитиннэрэринэн: “Учи.ру оскуола биэрбит сорудаҕын толорорго босхо. Кылаас оҕолоро платформаҕа хааччаҕа суох киирэн үөрэнэллэрин туһугар, учуутал бэйэтин тус кабинетыгар (личный кабинет) “Начать урок” диэн кнопканы туһаныахтаах. Маныаха учуутал 16.00 чааска диэри төһө баҕарар уруогу ыытыан сөп. Үөрэнээччи дьиэҕэ үлэтин толороро эмиэ босхо”, — диэн быһаарар.
Итини таһынан, Учи.ру платформаҕа төлөбүрдээх сурутуу эмиэ баар. Бу, үөрэх булгуччулаах чааһыгар киирбэт. Ол эбэтэр, уруогу таһынан үөрэнээччи бэйэтин баҕатынан эбии төлөөн дьарыктаныан сөп.
Маҥнай утаа, биллэн турар, ыйытыы элбэх буолуо. СӨ Үөрэҕин уонна наукатын министиэристибэтин саайтыгар ыраахтан олорон (дистанционно) үөрэниигэ аналлаах туспа салаа баар. Сиһилии онно билсиэххитин сөп. Ону таһынан, 8(4112) 506-928 “быһа сибээс” төлөпүөнүгэр эрийэн ыйыталыһаххытын сөп.
Людмила ПОПОВА, «Саха сирэ» хаһыат, edersaas.ru