Бу күннэргэ Кэбээйи нэһилиэгин «Кустук» уһуйаанын үлэһиттэрэ оскуолаҕа барар оҕолору тэйиччиттэн олорон атаардылар.
edersaas.ru
Атаарыы тэлэбиисэринэн биэрии курдук ыытылынна. Уһуйааҥҥа 4-5 сыл устата тэйбэккэ сылдьыбыт кырачаан иитиллээччилэрин төһө да тэйиччиттэн олорон атаардаллар, иитээччилэрэ олус долгуйдулар.
Быйыл «Кустук» уһуйаан аанын сабан атаарыллар оҕолор бииртэн-биир уратылаах, дьоҕурдаах оҕолор буолалларын иитээччилэрэ Ирина Терехова тоһоҕолоон бэлиэтээн туран, оҕо аайы уратыларынан көрөн, анал ааттары анаталаата. Өрүү көхтөөх оҕолор Алия Попова уонна Дарьяна Ефимова «Сыл бастыҥ выпускнига» ааты ыллылар.
«Кустукка» үтүө үгэһинэн сыл аайы «Сыл бастыҥ дьиэ кэргэнэ» аат иҥэриллээччи. Бу анал аат хаһаайыннарынан уһуйаан иитэр-үөрэтэр үлэтигэр сүбэ-ама буолар уонна ыытыллар тэрээһиннэргэ оҕолорун өрүү кытыннарар, күүс-көмө дьон Александр Давидович уонна Саргылана Николаевна Поповтар дьиэ кэргэттэрэ буоллулар.
Төрөппүттэр уһуйааннарыгар махталларын биллэрдилэр. Тэрээһин видеоҕа уһуллан, таҥыллан кырачааннар хаартыскалара түмүллүбүт диискэлэргэ килэриллэн, тарҕанан оҕолорго үйэ-саас тухары үтүө өйдөбүл буолуоҕа.
Татьяна МАКСИМОВА-ЛАЗАРЕВА,
Кэбээйи сэл.