Дьокуускай куоракка оҕо дыбарыаһын иһинэн үлэлиир «Тыыннаах тыл» мастарыскыай ийэ тылы, төрүт үгэһи үйэтитэр. Оҕолорго төрөөбүт тылларынан саҥаралларыгар, айар-тутар дьоҕурдара сайдарыгар төһүү күүс буолар.
Оттон бүгүн, бэс ыйын 2 күнүгэр, Улуу Кыайыы 75 сылыгар анаммыт «Тыыннаахтар умнубат сыллара» диэн өрөспүүбүлүкэтээҕи хоһоон күрэһэ түмүктэннэ. Бу мастарыскыай салайааччыта Лина Семеновна Яковлева санаатын үллэһиннэ:
— Оҕоҕо төрөөбүт тылынан саҥарарыгар, айарыгар-тутарыгар анаан мастарыскыайбыт иһинэн үгүс тэрээһини ыытабыт. Билигин коронавирус дьаҥа туран, күрэстэрбит үксэ социальнай ситим нөҥүө буолаллар. «Тыыннаахтар умнубат сыллара» диэн Кыайыы 75 сылыгар анаммыт аһаҕас күрэспитигэр өрөспүүбүлүкэ араас муннугуттан уопсайа 34 үлэ киирбитэ. Ол курдук, Мииринэй, Хаҥалас, Таатта, Мэҥэ Хаҥалас, Дьокуускай уонна коррекционнай интэринээт оскуола оҕолоро эмиэ көхтөөхтүк кытыннылар. Күрэспитигэр алын, орто уонна үрдүкү сүһүөх кылаастарга араартаан үлэлэри көрдүбүт. Оҕо айар дьоҕура сайдарын таһынан, маннык күрэхтэр оҕо билиитин, дойдутун устуоруйатын сиһилии билэригэр көмөлөөхтөр.
Ульяна Захарова, edersaas.ru