Хаҥалас оройуоннааҕы суутугар С. диэн киһи дьыалата көрүллэн, РФ Холуобунай кодексатын 318-с ыст. 2-с чааһынан бириигэбэр таҕыста.
Суут быһаарбытынан, 2017 сыл сэтинньи 25 күнүгэр Хаҥалас улууһун 1 Дьөппөн нэһилиэгэр бу киһи «МТЗ-82» тыраахтарын итирик туруктаах ыыта сылдьарын, ГИБДД иниспиэктэрэ тохтоппут.
Онуоха кини полицейскай сокуоннай модьуйуутун толорбокко, ону сөбүлээминэ, соруйан эчэтэр сыаллаах, иниспиэктэри тыраахтар хомуоһунан тэбистэрбит.
Сууттанааччы буруйун толору билиммитин, оҥорбутун кэмсиммитин, икки оҕолооҕун итиэннэ дьыаланы арыйыыга, силиэстийэлээһиҥҥэ көхтөөхтүк көмөлөспүтүн иһин, суут кинини 3 сылга көҥүлүн быһары усулуобунайынан ааҕан, 3 сыл тургутар болдьоххо анаабыт.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.