Тохсунньу 12-24 күннэригэр Саха сиригэр икки тымныытынан аатырар улуустарга – Дьааҥыга уонна Өймөкөөҥҥө — ханна ордук тымныытын быһаарар тест-эспэдиисийэ үлэлиэҕэ.
edersaas.ru
Тымныыны бастакы хорсун чинчийээччилэринэн Арассыыйаҕа киэҥник биллэр суруналыыстар уонна блогердар буоллулар.
Ол курдук, айанньыт-блогер Илия Воскресенскай, блогер уонна фотограф Павел Матвеев, туризм туһунан биэриилэри оҥорор суруналыыс Наталия Белякова уонна «Вокруг света» биэрии суруналыыһа Константин Чалабов 13 хонук устата тохсунньу тымныытыгар балааккаҕа олоро сылдьан, анал прибордарынан күн-дьыл туругун чинчийиэхтэрэ.
Туристары ааттаах-суоллаах айанньыт Герман Арбугаев уонна эмиэ уопуттаах айанньыт, идэтинэн травматолог-быраас Георгий Цыпандин арыаллыахтара. Кинилэр оттуллар балааккаларга хоно сытан, күн-дьыл туругун кэтээн көрүөхтэрэ.
Бырайыак ааптара — Арассыыйа туристарын Национальнай академиятын академига Вячеслав Ипатьев. Кини бэлиэтииринэн, уон сыллааҕыта толкуйдаабыт бырайыагын быйыл саҥа олоххо киллэрдэ. Бырайыак сыл аайы наукаҕа олоҕуран ыытыллыаҕа. Манна араас дойдуттан баҕалаах туристары кытыннарыахтара. Онон быйылгы тохсунньутааҕы температура эһиил уларыйыан сөп.
Бырайыак ааптара Вячеслав Ипатьев бу эспэдииссийэни үлэлэтэригэр сылы быһа бэлэмнэммит. Ол курдук, күнү-дьылы кэтээн көрүү, чинчийии Санкт-Петербургдааҕы А. И. Воейков аатынан Кылаабынай геофизическай обсерватория нөҥүө ыытыллар. Эспэдиийсийэ ыыппыт үлэтин түмүгэ бу институт учуонайдарыгар туттарыллар. Онон халлаан туругун кэтээн көрүү метеорологтар ыытар ньымаларынан оҥоһуллуоҕа. Ол курдук, эспэдиисийэ кыттааччылара стационарнай ньыманан — лааҕырга датчиктардаах метеобудкалары туруоран уонна мобильнай ньыманан — 5-10 км радиустаах сиргэ табанан тиийэн анал цифровой термометрынан кэтээн көрүөхтэрэ. Ол эбэтэр метеокэтээн көрүү хаһан да ыытыллыбыатах сирдэргэ ыытыллыаҕа. Оннук сирдэринэн Өймөкөөн улууһун Бурустаах (Аартык бөһүөлэгиттэн чугас) уонна Дьааҥы улууһун Киэҥ Үрэх диэн сирдэрин таллылар.
Күнү-дьылы чинчийии үлэтэ тохсунньу 24 күнүгэр түмүктэниэҕэ. Сиһилии эспэдисиийэ кыттыылаахтара суруналыыстары кытта көрсүһүүлэрин кэмигэр санааларын атастаһыыларын «Саха сирэ» хаһыат» кэлэр чэппиэрдээҕи нүөмэригэр ааҕыҥ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.