Тымныы полюһугар — саҥа бассейн!

Ааптар: 
Бөлөххө киир:

Бу күннэргэ сылаас күнү-дьылы баттаһа, Өймөкөөн улууһун Сордоҥноох нэһилиэгэр саҥа бассейн үлэҕэ киирдэ.

edersaas.ru


Олохтоох дьаһалта баһылыга Иван Максимов бэлиэтииринэн, нэһилиэккэ чугаһынан сөтүөлүүр сир суох. Индигир, хайалаах сир өрүһэ буолан, уута тымныы. Олохтоохтор сөтүөлүөхтэрин төһө да баҕарбыттарын иһин, бассейн туһунан санаабат да этилэр. Хата, кинилэр дьоллоругар, нэһилиэги тупсарыы бырагыраамата олоххо киирэн, 4,5 мөл. солк. граны көмүскээн, олохтоох дьаһалта баһылыга Тупсарыы сылыгар сордоҥноохтор ыра санаа оҥостубут бассейннарын олоххо киллэрэргэ санаммыта. Иллэрээ сыл уонна былырыын Сордоҥноох нэһилиэгэ субуруччу «Тупсарыы граныгар» тиксибитэ. Ол үбүлээһининэн нэһилиэк кэлиҥҥи сылларга наһаа тубуста.

—  Сайыммыт төһө да кылгас буоллар,  дьоммутун сөтүөлэтэн үөрдээри, былырыын Томтор нэһилиэгин урбаанньыта Иван Заболоцкайы кытта дуогабар түһэрсэн, 12х6 кв м иэннээх, 1 м 60 см дириҥнээх бассейн туттарбыппыт. Бу күннэргэ ис-тас үлэ бүтэн, биир күн олохтоох дьаһалта уу баһар массыынатынан 80-ча куб. ууну тастаран куттардыбыт. Нэдиэлэ саҥатыттан күммүт чаҕылыччы көрөн, куйаас күннэр саҕаланан, дьон хото сөтүөлээн эрэр, — диэн кэпсиир Иван Максимов.

Бассейн өнньүөс үрдүгэр турар буолан, ууну ыытыы судургу эбит. Олохтоох дьаһалта нэдиэлэҕэ биирдэ бассейн уутун уларытар былааннаах.

Дьэ, онон нэһилиэк олохтоохторо күннээх Крымҥа баран муораҕа сөтүөлээри харчыларын барыахтааҕар, дьиэлэриттэн сүүрэн тахсаат, ып-ыраас уулаах Индигирдэрин уутугар сөтүөлүүллэрин быдан ордороллоро чахчы. Тымныы полюһа диэбэккин, кырдьык да, киһи сөҕөр бассейна тутуллубут!

Елена ПОТОЦКАЯ, «Саха сирэ» хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0