Тымныы полюһугар Өймөкөөҥҥө Германия туристара кэлэн сөтүөлээтилэр!

Ааптар: 
Бөлөххө киир:

Бу күннэргэ Тымныы полюһугар — Өймөкөөҥҥө чысхаан тымныы түһэн, омук туристара «сынньана» кэлэр  сезоннара саҕаланна.

edersaas.ru

Бэҕэһээ Өймөкөөн нэһилиэгэр Германия Мерзебург куоратыттан туристар кэллилэр. Кинилэр бүгүн Индигииргэ тоҥмот өйүмэҕэ сөтүөлээтилэр.

69 cаастаах Лютер Фингрэфе уонна Гудрун Хоер Өймөкөөҥҥө иккис сырыылара. Кинилэр былырыын олунньуга кэлэ сылдьыбыттара. Быйыл Магадааҥҥа баран иһэн: «Тамара Егоровнабытын итиччэ чугаһаан баран, хайаан да көрсөн барабыт»,диэн айаннарыттан күннэрин быһан,  Өймөкөөн нэһилиэгэр «киирэн» аастылар, — диэн кэпсиир кырдьаҕастары Москваттан ыла арыаллыы сылдьар тылбаасчыт Алена Трубнякова.

Германияттан сылдьар ыалдьыттар ахсынньы 24-25 күннэригэр Католическай Ороһооспону көрсөөрү бэлэмнэнэллэр эбит.

Билигин Германияҕа +15 кыраадыс сылаас, ардах түһэ турар. Онтон мин арыаллыы сылдьар туристарым дьиҥнээх хаардаах кыһыҥҥа Ороһооспону көрсөөрү анаан бэлэмнэнэн кэлбиттэр. Кинилэр былырыын балаакка отуннаран эмиэ сөтүөлээбиттэрэ. Онно — 55 кыраадыс тымныы этэ. Оттон бүгүн сылаас күн — — 45 кыраадыс, өссө күннээх! —— диэн үөрэ-көтө кэпсиир Алена Трубнякова.

Лютер Фингрэфе уонна Гудрун Хоер былырыын тымныы буолан, оскуола сабыллан турар кэмигэр кэлбиттэр. Онон оҕолору көрсүбэккэ хомойон барбыттар эбит. Быйыл анаан оҥостон, Германияттан бэлэхтээх кэлбиттэр.

Кинилэр оскуолаҕа сылдьан, минньигэс бэлэхтэри тэҥэ «Киһи анатомията» диэн ньиэмэс тылынан научнай кинигэ бэлэхтээтилэр.

Алын сүһүөх кылаас оҕолоро туристары кытта дуоһуйуохтарыгар диэри оонньоотулар.

Католическай Ороһооспону тымныы полюһугар бырааһынньыктаан баран, кэргэнниилэр салгыы Магадааҥҥа барыахтара. Онтон Владивостокка күүлэйдээн баран, Новосибирскайынан Германияларыгар төннөр былааннаахтар.

Дьэ, сыл аайы Тымныы полюһугар тиэстэр кыах дьон эбит дии!» — диэн сөхпүппэр, Алена мин тугу таайтаран эппиппин тута сэрэйдэ: «Суох, доҕоор, бу харчыларын барыы сатыыр баай дьон буолбатахтар. Германияҕа  үгүс  киһи биэнсийэлэригэр бу курдук омук сирдэринэн айанныыр кыахтаахтар, — диэн анаан тоһоҕолоон бэлиэтээтэ.

Онон Өймөкөөн улууһун биллэр предпринимателэ, омук туристарын ийэлээтэр ийэлэрэ Тамара Васильева аатын ааттаан омуктар иккилиитэ-үстүүтэ кэлиилэрэ кими да соһуппат. Ханнык омук дойдутугар туроператордары итинник убаастаан төттөрү-таары тиэстэллэрэ буолла?

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Саргылаана Спиридонова түһэриитэ, видеоҕа Алена Трубнякова устуута.

+1
0
+1
0
+1
0
+1
0
+1
0
+1
0
+1
0