2020 сыл Өймөкөөн улууһугар ураты суолталаах. Улуус тэриллибитэ үбүлүөйдээх 100 сыла.
Бу дьоһуннаах үбүлүөйгэ туһуламмыт үгүс үлэ ыытыллар. Сыл далааһыннаах тэрээһинэ экстремальнай сүүрүү марафонунан саҕаланна. Бу туһунан «Тымныы киинэ» өрөспүүбүлүкэтээҕи суолталаах уопсастыбаннай тэрилтэ салайааччыта Аксинья Сивцева маннык кэпсиир:
— Улуу Кыайыы 75 сылынан сибээстээн, өрөспүүбүлүкэтээҕи таһымнаах «Мэҥэ өйдөбүнньүк», «Үлэ фрона» партийнай уонна спортивнай тэрилтэлэр, «Тымныы киинэ» уопсастыбаннай тэрилтэ тымныы полюһугар — Өймөкөөн улууһугар иккис төгүлүн кыһыҥҥы экстремальнай сүүрүү марафонун тэрийэн ыыталлар. Бу тэрээһиҥҥэ улуус уонна нэһилиэктэр салалтаталара кыттыыны ылаллар.
Былырыын тэрээһини Өймөкөөн нэһилиэгин олохтоох дьаһалтата ыыппыт буоллаҕына, быйыл Томтор нэһилиэгэ көҕүлээн тэрийдэ. Улуу кыайыы 75 сылыгар анаммыт бырайыагы өйөөн, бырабыытылыстыба икки оптуобуһу биэрэн, бүгүҥҥү марафоҥҥа Саха сирин 27 сүүрүүк-спортсмена кыттыыны ыллылар.
Өксөкүлээх Өлөксөй сиэнэ Степан Охлопков кэргэнин кытта кэлэн, бэҕэһээ спортсменнардыын Үрэх Төрдүгэр, Өксөкүлээх сэргэлэригэр тиийэн алгыс ыллылар.
Мантан киэһэ улуус баһылыга Иннокентий Сивцев биллэрбит Үлэ сылын өйөөн, тэрээһини тэрийиигэ сүүрбүт-көппүт, тэрийсибит дьоммутугар махтаныахпыт, кыайыылаахтары наҕараадалыахпыт уонна «төгүрүк остуолга» санаа атастаһыытын ыытыахпыт.
Африкаҕа бэрт улахан усунуостаах «Саамай куйаас марафон» тэриллэр буоллаҕына, тымныы полюһугар «Саамай тымныы марафон» хайаан да баар буолуохтаах. Эһиилгиттэн бырайыак СӨ Спорт министиэристибэтин көҕүлээһининэн ыытыллыаҕа.
Саҕалааһын түбүктээх эрээри, дьоһун түмүктэрдээх, кэскиллээх буолуоҕа. Улууспутугар кыһыҥҥы туризм бэстибээлин эмиэ уопсастыбаннас күүһүнэн саҕалаабыппыт. Билигин 2-3 күҥҥэ олохтоохтор туристары тиэйэн, аһатан, хоннорон, хатааһылатан, муус оҥоһук оҥорон, кинилэргэ анаан атыы-тутуу тэрийэн, 2 мөл. солк. тиийэ үбү киллэрэллэр. Онон Томтордооҕу култуура дьиэтэ сыллааҕы былаанын аҥарын икки күн иһигэр толорор. Улууспут инники сайдыыта тыа сиригэр туризмы кытта сибээстээх.
Былырыын Өймөкөөҥҥө Молдавияттан экстремал-марафонец Дмитрий Волошин 50км, Италияттан аатырбыт марафонец 39 км Паоло Вентурини 39 км сүүрбүттэрэ. Омук сүүрүүктэрэ 60 кыраадыс тымныыга бэйэлэрин холонон көрбүттэрэ. Кинилэр иннилэринэ Өймөкөөҥҥө Саха сирин 16 быһый атахтааҕа эстафетаны аспыта. Онно Амма улууһун Эмис нэһилиэгин баһылыга Илья Пестерев 38 км 3 чаас 53 мүн. иһигэр сүүрэн кэлбитэ.
Бүгүн Өймөкөөҥҥө олохтоохтор этэллэринэн, «олох сылаас. — 40°кыраадыс эрэ». Бу чааска бастакы кыайыылаах билиннэ. Батсаапка суруйалларынан Чурапчытааҕы физкультура уонна спорт институтун бэрэстэбиитэлэ Василий Лукин биэтэккэ бастакынан таҕыста.
Кэрэхсэбиллээҕэ баар, Өймөкөөн улууһуттан Сордоҥноох нэһилиэгин уолаттара Георгий Прудецкай уонна Степан Слепцов марафоҥҥа кыттыыны ыллылар. Уолаттар 10 км бастакы уонна иккис миэстэлээхтэр.
Онон бүгүн, Өймөкөөҥҥө ыытыллыбыт суолталаах тэрээһин, Өймөкөөн улууһугар туризмы сайыннарыы өссө биир брендинэн буолуо диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Хаартыска: социальнай ситимнэртэн.