Ыраах Дьааҥы улууһугар «Тымныы Полюһа» ТХПК тыа хаһаайыстыбатын үлэтин-хамнаһын хас да көрүҥүн тэрийэн олорор.
edersaas.ru
Аҕыс нэһилиэккэ үүт тутан, үрүҥ ас уонтан тахса көрүҥүн астыыр, эккэ эмиэ үлэлиир. Ону таһынан, астыыр тиһиги быспат, кэмбинээт кыамтатын толору туһанар туһуттан, 2015 с. «Алгыс» кэпэрэтииби тэринэн, ынах сүөһүнү иитэр. Күн бүгүн улаханныын-кыралыын 230 сүөһүлээх.
– Биһиги сүрүн кыһалҕабытынан сүөһү аһылыгын хааччыйыы буолар, – диир кэпэрэтиип бырабылыанньатын бэрэссэдээтэлэ Екатерина Портнягина. — Былырыын курааннаан уонна тыа баһаардара тураннар, от үүммэккэ бэйэбит күүспүтүнэн 200 туонна оту хааччыммыппыт уонна бырабыыталыстыба, Тыа хаһаайыстыбатын министиэристибэтин көмөлөрүнэн 200 туонна оту кыһыҥҥы суолунан аҕалтаран, үөрүүбүт-махталбыт улахан.
Быйыл эмиэ курааҥҥа уонна баһаарга пандемия эбиискэлэстэ. Биһиги сыллата Остуолба нэһилиэгэр Киэҥ Сыһыы диэн, урукку сылларга «Дьааҥы» сопхуос 500-600 туонна оту баһар сириттэн ходуһа түүлэһэн, сайын устатыгар иккитэ-үстэ төхтүрүйэн, «күүлэй» тэрийэн, кыстыыр оппут улахан аҥаарын булунар идэлээхпит, ордугун чааһынайдартан атыылаһааччыбыт. «Күүлэйгэ» чугастааҕы нэһилиэктэртэн уонна улуус кииниттэн хамаандалар кэлэннэр, үөрэ-көтө, бэйэ-бэйэлэрин көҕүтүһэн, 120-130 туонна оту чөкөтөн биэрээччилэр. Быйылгы «күүлэйи», дьаҥынан сибээстээн киллэриллибит хааччахтааһын эрэсиимэ баҕар холкутуйуо диэн, от ыйын 25-26 күннэригэр былааннаабыппыт эрээри, элбэх киһилээх маассабай дьаһал көҥүллэммэтинэн, тэрийбэтибит. Инньэ гынан, биир туонна оту 10 000 солкуобайга атыылаһыахпыт диэн чааһынай дьону кытары дуогабардаһан уонна түөрт мобильнай биригээдэни тэрийэн, оттотон эрэбит. Дьааҥы патриота Герасим Горохов ууну халытан нүөлсүппүт буолан, Киэҥ Сыһыы үүнүүтэ куһаҕана суох, оттон атын нэһилиэктэргэ от үүнүүтэ мөлтөһүөр итиэннэ ойуур баһаардара тураннар, ханна даҕаны киһини тыыннарбат буруо тунуйда. Ол да буоллар, отчуттарбыт төһө кыайалларынан тирбэҕэлэһэ сылдьаллар. Итинник дьаһанан, кыстыгы көрсө сатаатар, 200 туонна оту хааччынарбыт буоллар дэһэбит.
Уопсайынан, коронавирус дьаҥа турбута илиибитин-атахпытын улаханнык баайда: урукку сыллар үгэстэрин сөргүтэн, Дьааҥы куорат орто оскуолатын салалтатын кытары сүбэлэһэн, үрдүкү кылаас үөрэнээччилэригэр Үлэ-сынньалаҥ лааҕырын тэрийэн, оҕолору оттооһуҥҥа үөрэтэргэ былааннаабыппыт табыллыбата уонна ити күүлэйи өссө кэҥэтэн оҥоруохпут диэбиппит хаалла…
Түгэнинэн туһанан, өрөспүүбүлүкэ салалтата уонна Тыа хаһаайыстыбатын министиэристибэтэ биһиги балаһыанньабытын өйдөөннөр, бу уһук хотугу дойдуга ынах сүөһү ахсаанын аҕыйаппат, нэһилиэнньэ үүт-эт аһылыгынан хааччыллыытын аччаппат туһуттан, былырыыҥҥы курдук, мобильнай биригээдэлэри тэрийиигэ үп-харчы көрөллөрүгэр уонна аны кыһын 200 туонна оту тиэйиигэ субсидия көрөллөрүгэр көрдөһөбүт.
Раиса Сибирякова, «Саха сирэ» хаһыат, edersaas.ru