«Тылы таай». Төлөпүөҥҥэ саҥа оонньууну оҥордулар

Н.Э. Бауман аатынан Москватааҕы университет устудьуоннара Slonozavr диэн ааттанан «Тылы таай» диэн төлөпүөннэргэ аналлаах саҥа оонньуу таһаардылар. Уолаттар көрдөһүүлэринэн ааттарын ыйбаппыт. Кинилэр энергетика эйгэтигэр үөрэнэллэр. Программированиены уруккуттан интэриэһиргээн, хобби оҥостубуттар. Оонньууну PlayMarket электронай «маҕаһыыныттан» хачайдыахха сөп.

— Бу сыһыарыыны оҥорор санаа хантан кэлбитэй? 
— «Угадай слово» диэн аатырбыт оонньуу. Араас омук тылыгар барытыгар тарҕаммыт. Тоҕо биһиги сахабыт тылыгар суоҕуй дии санаабыппыт. Билиҥҥи кэмҥэ тылбыт сайдарыгар маннык курдук сыһыарыылар хайаан да баар буолуохтаахтар. Түөрт хартыына тахсар, онно туох эттик, барамай, өйдөбүл көстөрүн таайыахтааххын. Эмиэ даҕаны «Поле чудес» курдук, тыл хас буукубалааҕа көстөр. Онно хоруйгун суруйаҕын уонна салгыы бараҕын.
— Дьон төһө хачайдыырый? Интэриэһиргээтилэр дуо?
— Интэриэс баар. Дьон үксэ сөбүлээбит. Бүгүҥҥү күҥҥэ 1500-тан тахса киһи хачайдаабыт. Санаабытыгар, бу олус үчүгэй көрдөрүү. 
— Сыһыарыыны хаһан оҥорбуккутуй? 
— Атырдьах ыйын бүтүүтэ барытын ситэрэн-хоторон 31-кэ «маҕаһыыҥҥа» таһаарбыппыт. 
— Эһиги санааҕытыгар, саха программистара аан дойду ырыынагар омуктары кытта күрэхтэһэр кыахтаахтар дуо? Тэҥҥэ хардыылырга туох нааданый, туох тиийбэтий? 
— Аҥаардас Сахабыт сиригэр хас да хампаанньа аан дойду ырыыныгар оонньуу оҥорорун дьарыктаналлар. Ыырдара киэҥ. Ханна төрөөбүккүттэн, тылгыттан, омуккуттан тутулуга суох кими баҕарар кытта илин-кэлин түсүһэр кыахтаахпытын бу дьон дакаастаатылар. Киһи баҕатын толороругар, сыалын ситиһэригэр бэйэтигэр эрэниэн уонна дьаныардаахтык үлэлиэн наада. Барыта сатанар. 
— Атын программистары кытта билсэҕит дуо? Инники туох былааннааххытый? 
— Хомойуох иһин суох, билсэр киһи. Былаан элбэх, саха тылыгар сыһыаннаах сыһыарыылары өссө даҕаны оҥорор баҕалаахпыт.  
— AppStore «маҕаһыыныгар» (Apple хампаанньа төлөпүөннэрэ, планшеттара) баар буолуо дуо?
— Былааҥҥа баар. Чуолкай хаһан тахсарын этэр кыахпыт суох.

Slonozavr уолаттара төлөпүөҥҥэ сүрүн хартыына быһыытынан туруорарга тэлимниир саха былааҕын уонна балаҕан сыһыарыытын оҥорбуттар.

Надежда САМСОНОВА.