Быйыл Бүлүү улууһун Тылгыны нэһилиэгэ 100 сыллаах үбүлүөйүн бэлиэтиир.
edersaas.ru
Тылгынылар бу суолталаах тэрээһини үөрүүлээх быһыыга-майгыга бэлиэтээри хас да сылы быһа бэлэмнэннилэр эрээри, сыстыганнаах дьаҥ мэһэйдээн кэбистэ. Ол эрээри, ону ол диэбэккэ, нэһилиэк олохтоохторо үйэлээх үбүлүөйдэрин биир дойдулаахтарын мунньан бэлиэтээри дьоһуннаахтык бэлэмнэнэ сылдьаллар. Бу туһунан баһылык солбуйааччыта Христина Васильева бу курдук кэпсиир:
— Бэс ыйыгар Тылгыны нэһилиэгин баһылыга Егор Иванов нэһилиэк 100 сылыгар бэлиэ туруорарга анаан Мэҥэ тааһы аҕалбыта. Онно оҥочонон аҕалыыга төрүт олохтоох эр дьон Христофор Васильев, Иван Васильев, Владимир Андреев көмөлөстүлэр. Егор Афанасьевич былаанынан Мэҥэ таас анныгар 50 сылынан арыллыахтаах анал «Кэм капсулата» угуллуоҕа. Онно Тылгыны нэһилиэгин олохтоохторо кэлэр көлүөнэҕэ аадырыстаммыт суругу угуохпут.
… Бу күннэргэ тылгынылар Мэҥэ таас анныгар угуллуохтаах сурук ис хоһоонун уонна «Кэм капсулатын» бэлэмнии сылдьаллар.
Елена ПОТОЦКАЯ, «Cаха сирэ» хаһыат, edersaas.ru