Арассыыйаҕа Тыйаатыр сылынан Саха сиригэр тэрээһиннэр тиһиктээхтик салҕанан эрэллэр. Ол курдук, Саха Өрөспүүбүлүкэтин Култуураҕа уонна духуобунай сайдыыга министиэристибэтэ, Саха сирин норуоттарын муусукатын уонна фольклорун музейа кыттыһан, өрөспүүбүлүкэ оскуолатын үөрэнээччилэригэр «Билии-2019» кэтэхтэн олипмиаданы тэрийэн ыыталлар. Бу туһунан сиһилии музей наукаҕа сотруднигыттан Мария Корниловаттан ыйыталастыбыт.
—Бастатан туран, оҕону төрөөбүт тылынан уус-уран айымньыга, искусство араас көрүҥэр билиитин-көрүүтүн тургутар, чиҥэтэр, иҥэрэр, кэҥэтэр сыаллаах-соруктаах бу олимпиада тэрилиннэ. Маннык тэрээһиннэр оҕо ааҕарын, сэргээн үөрэтэрин көҕүлүүллэр. Ону сэргэ, оҕо тобуллаҕас толкуйданарыгар, анааран көрүүтэ сайдарыгар, санаабытын, толкуйдаабытын, быһаарбытын толору этэр кыахтанарыгар, тылын-өһүн сайыннарарыгар олук ууруллар. Итиэннэ, «ааҕар киһи — билиилээх, билиилээх киһи — сайдыылаах, сайдыылаах киһи — ситиһиилээх» дииллэрин курдук, оҕо билиитэ-көрүүтэ кэҥииригэр көмөлөһөр дьоһун суолталаах тэрээһин буолар.
Олимпиадаҕа өрөспүүбүлүкэ бары оскуолаларын оҕолоро, 1-11 кылаас үөрэнээччилэрэ, ким баҕалаах кыттар. Биллэн турар, саастарынан бөлөххө араарыллаллар. Ол курдук, 1 бөлөххө — 1-4 кылаас оҕолоро, иккис бөлөххө — 5-8 кылаас үөрэнээччилэрэ, үһүскэ — 9-11 кылаастар киирэллэр, — диэн билиһиннэрдэ.
Кыттарга сайаапка суруйаллар, анал бланка толорон ыыталлар. Ону сэргэ, 100 солкуобай усунуос төлөнөр. Кыттааччылар сайаапканы, усунуос төлөммүтүн туһунан квитанцияны уонна Приложение 2 куоппуйаларын bilii2019@mail.ru электроннай аадырыска олунньу 11 күнүттэн кулун тутар 10 күнүгэр диэри ыытаҕыт. Олимпиада сорудаҕа folkmuseum.ykt.ru , yaguo.ru тахсар. Хоруйдары bilii2019@mail.ru электроннай аадырыска кулун тутар 12 күнүгэр диэри тутуллар. Кулун тутар 13-14 күннэригэр үлэлэри дьүүллүүр сүбэ көрөр. Кулун тутар 15 күнүгэр олимпиада түмүгэ https://folkmuseum.ykt.ru, yaguo.ru саайтарга тахсыа.
Биһиги корр., «Саха сирэ» хаһыат, edersaas.ru
Сүрүн хаартыска: интэриниэттэн