Бүгүн коронавируһу бохсууга суһал штал мунньаҕа буолбут. Бүгүҥҥү балаһыаннаьаны уонна саҥа үөрэх дьылыгар бэлэмнэнии боппуруоһун көрбүттэр.
Кэлиҥҥи сууккаҕа өрөспүүбүлүкэҕэ 55 киһи ыалдьыбыт, итинтэн 42 киһи – Дьокуускай куоракка. Ааспыт нэдиэлэҕэ балачча үрдээһин бэлиэтэммитэ, 65 киһиэхэ тиийэ сылдьыбыта. Бырамыысыланнай оройуоннарга (Нерюнгри, Мирнэй) намтаабыт. Ону кытта тыа сирин улуустарыгар бүтэһик нэдиэлэҕэ эбилиннэ диэн Ил Дархан Айсен Николаев брифинг кэмигэр иһитиннэрдэ.
“Суһал штаб мунньаҕар туһааннаах министиэристибэлэр болҕомто ууралларыгар ыйдым. Хомойуох иһин, бүтэһик ыйга сабыылаах социальнай тэрилтэлэргэ – кырдьаҕастар дьиэлэригэр, психоневрологическай диспансердарга ыарыы баар түгэннэрэ бэлиэтэннилэр. Бу аата маннык сабыылаах, дьон ыалдьыа суохтаах тэрилтэлэригэр үлэһиттэр өттүлэриттэн нуорма тутуһуллубатын көрдөрөр. Онон быһаччы бу тэрилтэлэр салайааччыларын сэргэ, туһааннаах министиэристибэ эппиэтинэстээхтик сыһыаннаһара ирдэнэр. Тоҕо диэтэххэ, уончалыы киһи ыалдьыыта хатыланара Үлэ уонна социальнай сайдыы министиэристибэтин салалтатын өттүттэн үлэҕэ чопчу итэҕэс баарын туоһулуур”, — диэн Айсен Николаев эттэ. Итиэннэ миэрэ ылыллан, салгыы маннык түгэннэр хатыламматтарыгар эттэ.
Хомойуох иһин, бүгүҥҥү күҥҥэ өрөспүүбүлүкэ үрдүнэн 42 киһи ыарахан туруктаах эбит, итинтэн 11 ыарыһаҕы ИВЛ аппараакка холбообуттар. Саастаах дьон ыалдьара үксээбитин ыйар.
Ону тэҥэ, суукканы эргиччи үлэлиир уопсастыбаннай аһыыр сирдэргэ коронавируһу бохсууга туһаныллар ирдэбили тутуспаттарын туһунан үҥсүүлэр киирэллэрин эттэ.
Ил Дархан брифинг саҥа үөрэх дьылыгар бэлэмнэнии туһунан иһитиннэрдэ. Бастатан туран, бөдөҥ куораттар, нэһилиэнньэлээх пууннар үөрэххэ тэрилтэлэригэр салгыны ыраастыыр аппараатынан хааччыйыы наадатын ыйда. Манна бытаарыы баарын ыйар. Бары ирдэнэр миэрэлэр ылыллан, балаҕан ыйыгар оҕолор үчүгэй усулуобуйаҕа баран үөрэнэллэригэр эрэнэрин эттэ.
Людмила ПОПОВА, “Саха сирэ” хаһыат, edersaas.ru