Ил Түмэн XII (уочараттаах) пленарнай мунньаҕар өрөспүүбүлүкэ 2020 сылга уонна былааннаах 2021, 2022 сылларга бүддьүөтэ бигэргэммитэ.
Онуоха тыа хаһаайыстыбатыгар көрүллэр үп аччатыллыахтааҕар өссө кыратык эбилиннэ. Быйыл 9 млрд. 549 мөл. солк. көрүллүбүт буоллаҕына, 2020 сылга 9 млрд. 952 мөл. солк. көрүллэрэ быһаарылынна. «Тыа хаһаайыстыбатын сайдыытын уонна тыа хаһаайыстыбатын бородууксуйатын, сырье уонна ас-үөл ырыынагын 2020-2024 сс. сүрүннээһин» судаарыстыбаннай бырагыраама бырайыага ахсынньы 10 күнүгэр бигэргэннэ. Бу докумуоҥҥа Ил Дархан ыйааҕар туруоруллубут соруктар киллэрилиннилэр. Маны таһынан, ааспыт өттүгэр тыа хаһаайыстыбатын сайдыытын бырагырааматын иһинэн үлэлээбит тыа сирин сиринуотун кэлим сайыннарыы хайысхата туспа бырагыраама быһыытынан үлэлиэҕэ. Онон, сүрүннээн тыа хаһаайыстыбатын салаата бу икки докумуонунан салайтарыаҕа.
Тыа хаһаайыстыбатын сайдыытын саҥа бырагырааматынан 9 млрд. 952 мөл. 600 тыһ. солк., ол иһигэр федерацияттан 763 мөл. 200 тыһ., өрөспүүбүлүкэ бүддьүөтүттэн 9 млрд. 196 мөл. 400 тыһ. солк. харчы көрүлүннэ. Оттон тыа сирин сирин-уотун кэлим сайыннарыы биэс сыллаах бырагырааматынан 2020 сылга 3 млрд. 648 мөл. солк. көрүллүөхтээх. Бу иһигэр федерация бүддьүөтүттэн, “Үтүө дьыала” хамсааһынынан көрүллэр үбү киллэрбэккэ туран, 1 млрд. 851 мөл. 500 тыһ., өрөспүүбүлүкэ бүддьүөтүттэн 230 мөл. 500 тыһ. көрүллэр. Манна олохтоох дьаһалталар хос үбүлээһинин быһыытынан кыттыһаннар итиэннэ бүддьүөтү таһынан үп киирэр сирдэрэ тардылланнар, барыта 3 млрд. 648 мөл. солк. харчылаах үлэ-хамнас ыытыллыахтаах. Бу бырагыраама иһинэн үлэлиир “Тыа сирин аныгы мөссүөнэ” диэн биэдэмистибэннэй хос бырагыраамаҕа федерацияттан 948 мөл. солк. көрүллэн, 2020-2022 сс. 17 бөдөҥ социальнай эбийиэги тутуу уонна оскуолаларга, доруобуйа харыстабылын тэрилтэлэригэр сэттэ массыынаны атыылаһыы киллэрилиннэ.
“Саха Өрөспүүбүлүкэтигэр тыа сирин сирин-уотун кэлим сайыннарыы” бырагырааманан федерация үбүлээһинэ икки сылга үрдэтиллэрэ ситиһилиннэ, ол курдук, 2020 сылга — 948 мөл., 2021 сылга – 1 млрд. 100 мөл. көрүллүөҕэ, оттон 2022 сылга 340 мөл. солк. торумнанна эрээри, маны үрдэтэргэ, биллэн турар, министиэристибэ үлэлэһэр.
Раиса Сибирякова, «Саха сирэ» хаһыат, edersaas.ru