Тыа дьахталлара – Далбар Хотуттар

Ааптар: 
Бөлөххө киир:

1995 сыллаахха Холбоһуктаах нациялар тэрилтэлэрин Аан дойдутааҕы IV конференциятын кыттыылаахтара тыа сиригэр олорор дьахталлар таһаарыылаах үлэлэрин, оҕону иитиигэ-үөрэтиигэ сыраларын сыаналааннар, тыа сирин дьахталларын күнүн бэлиэтииргэ быһаарбыттара. Тыа хаһаайыстыбатын бородууксуйатын оҥорооччулар аан дойдутааҕы федерацията бу үтүө баҕаны өйөөбүтэ. Онон, алтынньы 15 күнэ – Тыа сирин дьахталларын аан дойдутааҕы күнүнэн бигэргэммитэ.
Тыа дьахтара! Бу элбэҕи этэр тыллар. Былыргы уу баһар улугурпут, ынах ыыр амньыраппыт, ыарахан олохтоох дьахталлар билигин суохтар. Саха дьахталлара күн бүгүн үөрэхтээхтэр, олох сайдыытын кытары тэҥэ хаамсаллар, тыа сирин олоҕун-дьаһаҕын сүрүннүүллэр. Кинилэр ыал ийэтин күннээҕи түбүгүн сүгэллэрин таһынан бары эйгэнэн таһаарыылаахтык үлэлииллэр, үлэҕэ-хамнаска сүрүн хамсатар күүс буолаллар. Уопсастыбаннай олоҕу-дьаһаҕы иилииллэр-саҕалыыллар.
Салайар-дьаһайар үлэҕэ эмиэ инники күөҥҥэ сылдьаллар. Төһөлөөх үгүс дьахтар нэһилиэк баһылыгынан, оскуола уонна култуура дьиэтин дириэктэринэн, оҕо саадын сэбиэдиссэйинэн үлэлиирий? Биир оччо дьахтар атыы-эргиэн салаатыгар хотоойутук ылсан, биирдэм тэрилтэ тэринэн, биир дойдулаахтарын аһынан-таҥаһынан хааччыйаллар.
Ылан көрүөҕүҥ тыа хаһаайыстыбатын. Элбэх бааһынай хаһаайыстыбатын, кэпэрэтииби ыал ийэлэрэ, дьахталлар тэрийэн үлэлии-хамсыы сылдьаллар. Кими да матарыаҕы баҕарыллыбат эрээри, бэрт аҕыйахтарын холобурдаатахха Бүлүүгэ А.В.Кырбасова, Кэбээйигэ А.В.Левина, Тааттаҕа А.А.Маркова, Е.М.Винокурова, Дьааҥыга Е.А.Портнягина, Чурапчыга М.К.Луковцева, В.М.Сивцева, В.Д.Васильева, Намҥа О.Г.Жиркова, Н.И.Попова, Мэҥэ-Хаҥаласка Т.В.Десяткина, Е.И.Дмитриева, Хаҥаласка О.П.Харламова, Өлүөхүмэҕэ Г.Е.Тергюльева, Өлөөҥҥө М.Н.Христофорова уо.д.а. үлэ-хамнас хастыы да көрүҥүн тэрийэн, үгүс киһини хамнастаан олороллор. Бу аныгы саха Далбар Хотуттарын, тыа сиригэр олоҕу хамсатааччылар тустарынан биһиги хаһыаппыт тиһигин быспакка сырдата турар. Сырдатыа даҕаны. Тоҕо диэтэххэ, кинилэр хас биирдиилэрэ:
— Мин дьиэ кэргэним, нэһилиэгим бигэ туруктаах уонна уйгулаах олоҕун тус бэйэм үлэбинэн ситиһэбин, хаҥатабын, — диэн санаанан салайтараллар.

Раиса СИБИРЯКОВА.

+1
0
+1
0
+1
0
+1
0
+1
0
+1
0
+1
0