Тустуу фанаттара «Боотур» бириэмийэни туттардылар

Ааптар: 
Бөлөххө киир:

Көҥүл тустууну сэҥээрээччилэр «Боотур» диэн норуодунай бириэмийэни бастыҥ бөҕөстөргө быйыл аан бастакытын туттардылар. Сылы түмүктүүр тэрээһини ааспыт нэдиэлэҕэ спортивнай суруналыыс Николай Бястинов иилээн-саҕалаан тэрийдэ. Манна сыл устата бэйэлэрин көрдөрбүт тустууктарга, тренердэргэ 11 анал ааты иҥэрдилэр. Сыаналаах бэлэҕинэн наҕараадалаатылар. Кыайыылаахтары суруналыыстар, экспертэр уонна фанаттар уопсай сүбэнэн таллылар.

Бассаапка фан-кулууптар мессенджер үөдүйүөҕүттэн ыла тэриллэн, көҥүл тустууну ырытыһаллар, саха бөҕөстөрүгэр күрэхтэһиигэ ыалдьаллар, тустуу сонунун тарҕаталлар. Билигин «Тустууга сүгүрүйэбин», «Тустуу сонуннара», «Албан», «Чыпчаал» о.д.а. бөлөх ахсаана отуччаҕа тиийдэ. Манна барытыгар сүүһүнэн киһи «олорор».Николай Бястинов, «Спорт Якутии» хаһыат таһаарааччы-эрэдээктэрэ, тэрийээччи:

— “БООТУР” бириэмийэ кыайыылаахтарын фанаттар бэйэлэрэ таллылар. Биһиги экспертэри кытта быһа холоон номинацияларынан араарбыппыт уонна бассаап бөлөхтөрүгэр баар дьоҥҥо бигэргэттибит. Анал статуэтка оҥоттордубут, фан-кулууптар “бырахсан”, урбаанньыттар уонна биирдиилээн дьон бириис туруоран бөҕөстөрбүтүн өттүк харалаатыбыт. Барыта 15 киһини бэлиэтээтибит. Тэрээһин кэмигэр кыайыылаах тустуук киирсиитин видеонан көрдөрдүбүт. Көҥүл тустуу сахаҕа спорт бастыҥ көрүҥэ. Сыл түмүгүн таһаарар, спортсменнары чиэстиир Чөмпүйүөннэр балларыгар биир-икки эрэ тустуук бэлиэтэнэр. Биһиэхэ тустуу фан-кулууба элбэх. Онон ыалдьааччылар санааларын, өйөбүллэрин бу бириэмийэнэн биллэрдилэр

Кыайыылаахтар:

  • «Открытие года» – Марина Рассадина, Ньургун Александров, Тимур Николаев, Георгий Окороков,
  • «Победа года»– Ньургун Скрябин,
  • «Бросок года» — Револий Самсонов,
  • «Наставник года» — Яков Филиппов,
  • «Спортивное долголетие» — Василий Алексеев,
  • «Стабильность года – Алексей, Петр Копыловтар,
  • «За проявленый характер» — Егор Пономарев,
  • «За волю к победе»- Айаал Лазарев,
  • «За мужество» — Виктор Лебедев,
  • «Перспективный тренер» — Артур Федоров,
  • «Золотой свисток» – Николай Николаев.

Эксперт санаата

Владислав Коротов, спортивнай суруналыыс:

— Фанаттар бэйэлэрэ түмсэн бэртээхэй бириистэри ылбыттар, саха эстрадатын сулустарын ыҥырбыттар. Саха сиригэр суох кыайыылаахтар видео-эҕэрдэлэрин ыыттылар. Олус сэргэх, үрдүк таһымнаах тэрээһин буолла. Өрөспүүбүлүкэ үбэ-харчыта бараммата. Биир даҕаны тойон-хотун, чунуобунньук наҕараадаҕа кыттыспата. Кырдьык, бөҕөстөрү дьиҥнээхтик норуот бэйэтэ бириэмийэлээтэ.

Спонсордар: «Спортик» СК (А.Васильев); «Барс» маҕаһыын (Р.Барабанов), «Албан» фан-кулууп (С.Архипов), «Тустууга сүгүрүйэбин» фан-бөлөх (С.Захаров), «Сахатранснефтегаз» АУо, (П.Ксенофонтов); Роман Дмитриев аатынан эрэл олимпийскай училищета; «Каре» ресторан (Айкар Кондратьев); Мэҥэ Хаҥалас улууһун хапсаҕайга бэдэрээссийэтин толорооччу дириэктэрэ М.Д. Забровскай; «Чыпчаал» фан-бөлөх (А.Аммосов); «Yakutian brand’s» хампаанньа.

Надежда САМСОНОВА, edersaas.ru

Владислав КОРОТОВ хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0