Кэлэр нэдиэлэ ортотуттан эмискэ тымныйыаҕа. Ол төрүөтүн туһунан Тускул сиһилии быһаарда.
edersaas.ru
— Атырдьах ыйын 9 күнүттэн саҕалаан 15 чыыһылаҕа диэри Тиксиигэ — хаар, тыал. Бэнидиэнньиккэ Булуҥ улууһун киинигэр буурҕа түһүөҕэ. Ити арктическай хаар-ардах өрөспүүбүлүкэ улуустарыгар үс күнү быһа — атырдьах ыйын 13-15 күннэригэр улахан тымныыны, хаһыҥы аҕалыаҕа, — диэн бэлиэтиир Тускул.
Салгыы норуот синоптига күнү-дьылы маннык быһаарар:
— Ол эрээри куттанымаҥ, бу тымныы күн дьыл өр барыа суоҕа, атырдьах ыйын 17-18 күннэриттэн халлаан сыыйа көнөн, сылыйан барыаҕа.
Киин улуустар. Атырдьах ыйын 13-15 күннэригэр оҕуруотчуттар сэрэниэххитин наада. Хотуттан тымныы салгын охсон, үс күҥҥэ түүн 3-4 кыраадыс эрэ сылыйыаҕа. Бу хаһыҥҥа тэҥнээх — оҕуруокка, сибэккигэ олус сэрэхтээх.
Бүлүү бөлөх улуустара. Атырдьах ыйын 13-15 күннэригэр түүҥҥү өттүгэр 3-4 кыраадыс эрэ сылаас буолуоҕа. Күнүс 15 кыраадыс сылаас. Кыра ардахтаах.
Соҕурулуу-арҕаа улуустар. Атырдьах ыйын 14 чыыһылатыттан биллэ сөрүүкүөҕэ. Түүн 5, күнүс 20 кыраадыс сылаас. Быстах ардахтаах.
Кэбээйи, Эдьигээн улуустара. Манна халлаан улаханнык «буккуллуоҕа». Түүҥҥү өттүгэр 2-3 эрэ кыраадыс, күнүс 15 кыраадыс буолуоҕа. Сыыйа атырдьах ыйын 16 чыыһылатыттан саҕалаан, халлаан көнүөҕэ.
Тымныы полюһа Өймөкөөн. Атырдьах ыйын 9 күнүттэн 14 күнүгэр диэри күн аайы — быстах ардах. 15 чыыһылаҕа манна биллэрдик тымныйар. Түүн 2-3 кыраадыстаах улахан хаһыҥ түһээри турар. Күнүс 15 кыраадыс буолар. Атырдьах ыйын 18 күнүттэн халлаан оннугар түһүөҕэ.
Халыма-Индигир улуустара. Кэлэр нэдиэлэттэн түүн 5, күнүс 15 кыраадыс сылаас. Атырдьах ыйын 15 күнүгэр 1-2 кырадыстаах хаһыҥ түһүөҕэ. Күнүс 10 кыраадыс буолуоҕа.
Өлөөн улууһа. Эмиэ 2-3 кыраадыс тымныйар, күнүс 15 кыраадыс сылыйыаҕа. Бу улууһу Ийэ Айылҕа ардаҕынан анаан хатаҕалыаҕа. Атырдьах ыйын 18 күнүттэн күнүс манна 25 кыраадыска тиийэ сылыйыаҕа.
Тиксии. Атырдьах ыйын 9 күнүттэн саҕалаан эмискэ тымныйыаҕа. Бэнидиэнньиктэн күүстээх буурҕа түһэн, түүҥҥү өттүгэр 0-1 кыраадыс тымныыны «биэриэҕэ». Күнүс баара-суоҕа 3 кыраадыс курдук эрэ сылыйыаҕа.
Онон атырдьах ыйын 13-15 күннэригэр Булуҥ буурҕата, хаара уонна тыала өрөспүүбүлүкэҕэ барытыгар «дьааһыйан», үс күн тымныйар.
Онтон атырдьах ыйын 18 күнүттэн сыыйа сылыйан, эмиэ сайыҥҥылыы сылаас күннэр буолуохтара.
Тускул үксүгэр улуустары барыларын ааттаан ырыппат. Бэйэ-бэйэлэрин кытта ыаллыы сытар улуус күнэ-дьыла биир кэриэтэ буоллаҕа. Оҕуруотчуттары сэрэттилэр, онон сибэккилэргитин, тэпилииссэҕитин эрдэттэн тымныыттан харыстааҥ.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.