Тускул: «Ыам ыйа хаардаах ардахха «төрөөтө»...
· - Олох-дьаһах

Тускул: «Ыам ыйа хаардаах ардахха «төрөөтө»

Урукку сылларга ыам ыйыгар күп-күөх халлааҥҥа сырдык күн чаҕылыйан, сааскы бырааһынньыгы уруйдаан-айхаллаан көрсөр эбит буоллахпытына, быйылгы ыам ыйа хаардаах ардахха «төрөөтө».

Ыам ыйын бастакы күннэригэр хайдах күн-дьыл буолуоҕун туһунан Тускул билгэлээтэ:

Киин улуустарга ыам ыйын 5 күнүгэр диэри тымныы -5 кыраадыска тиийиэҕэ. Алта чыыһылаттан халлаан көнөн, сылыйара күүтүллэр. Ол эбэтэр, күнүс +10 кыраадыс буолуоҕа. 

Бүлүү бөлөххө ыам ыйын 1 күнүгэр -5 кыраадыска тиийэ тымныйыаҕа. Ыам ыйын 4 күнүгэр диэри манна — хаар, ардах. Бу иннинэ сылыйан аҕай турбут күн-дьыл эмискэ тымныйда. Ыам ыйын 5 күнүттэн халлаан туруга көнөн барыаҕа. Манна эмиэ +10 кыраадыска тиийэ  сылыйыаҕа. 

Уопсайынан, ыам ыйын 1 күнүгэр улуус аайы халлаан «буккуллар».  Ол курдук, Өлүөхүмэ, Ленскэй улуустарыгар +15 кыраадыс сылыйа турбут буоллаҕына, ыам ыйын 1-кы күнүгэр -5 кыраадыска тиийэ тымныйыаҕа. 

Кэбээйигэ, Эдьигээҥҥэ ыам ыйын 1-кы күнүгэр түүн  -10 кыраадыска тиийэ тымныйыаҕа,  күнүс -3 кыраадыс тымныы. Бу улуустарга эмиэ ыам ыйын 5 күнүттэн халлаан туруга көнүөҕэ.

Өймөкөөҥҥө түүн -10 кыраадыс тымныы. Күнүс +1 кыраадыс сылаас буолуоҕа. Ыам ыйын 3 күнүттэн сылыйыаҕа. Өймөкөөннөрү +7 кыраадыс сылаас буолан үөрдүөҕэ.

Дьааҥыга ыам ыйын бастакы күннэригэр — хаар, ардах. Халыма-Индигиир улуустарыгар -5 кыраадыс тоҥоруоҕа. Ыам ыйын 4-5 күннэригэр сыыйа сылыйыаҕа. 

Өлөөҥҥө ыам ыйын 1 күнүгэр түүн -15 кыраадыс тымныйыаҕа, күнүс -7 кыраадыс тымныы. Манна ыам ыйын 8-9 күннэрин эрэ диэки сааскы сылаас тыын биллиэҕэ. 

Тиксиигэ уонна Анаабырга түүн -15 кыраадыс, күнүс -5 кыраадыс тымныы. Манна эмиэ — ардах уонна хаар. 

Бу күннэргэ ыам ыйын 4 күнүгэр диэри хаары, ардаҕы кытта 10-15 м күүстээх тыал түһүөҕэ. Өлүөхүмэҕэ 18 м күүстээх тыал түһүөҕэ. Кэбээйигэ — 15 м тиийэ күүстээх тыал. 

… Онон норуот синоптига бэлиэтииринэн, дьиэҕэ олорор эрэсиими тутуһарга саамай тоҕоостоох кэм буолсу — тымныы күҥҥэ-дьылга кыра кыһалҕалаах  киһи таһырдьа тахсыан баҕарбата чахчы. Онон бырааһынньык күннэргэ сылаас дьиэҕэ олоруоҕуҥ, нус-хас сынньаныаҕыҥ.

Елена ПОТОЦКАЯ, «Саха сирэ» хаһыат, edersaas.ru

Хаартыска — интэриниэттэн.

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

четыре − два =